أحمد عبدالوهاب: مسلسل ورد على فل وياسمين رجعلي ذكريات مرض زوجتي بالسرطان

تحدث الفنان أحمد عبدالوهاب عن كواليس مشاركته في مسلسل ورد على فل وياسمين، الذي يعيده بذكريات مرض زوجته.

قال أحمد عبدالوهاب عبر تصريحات تلفزيونية: «أول ما كلموني بعتولي المسلسل قريت أول حلقتين انبسطت جدًا المواقف مكتوبة حلو أوي».

وتابع: «الشخصيات مكتوبة بشكل كويس جدًا عجبني الاختلاف اللي في المسلسل بقولهم المسلسل دا دافي جدًا، من أول حلقتين قلتلهم أنا موافق، وحاولت أطلع شخصية طارق ساذج كيوت مش فاهم حاجات كتير في الدنيا من غير ما يبقى كاركتير هو شخص حقيقي موجود زيه كتير بنشوفهم في حياتنا».

واستكمل أحمد عبدالوهاب: «ففكرة أنك تعمل شخصية متشافة كتير في الحياة بيبقى أصعب من الشخصية المعقدة بكتير الناس بتبقى فاكرة العكس، هو دكتور تحاليل أهله قافلين عليه بيذاكر وينجح ويعمل ماجستير ملوش أي تجارب شقية، هو شخصيته بعد إلهام اتغيرت في الأول كان مش شايف غير هدفه اللي هو هدف أبوه في الأساس مش بيتحمل مسئولية لأن أبوه اللي شايل كل حاجة».

وأضاف: «لحد ما يقابل إلهام وبيتغير ويشيل المسئولية وتحوله حياته كلها، وبتحصل مشاكل بينه وبين الأهل بسبب قصة الحب مع إلهام أنها أكبر منه ومطلقة فإحنا بنوصل رسالة عن قصة الحب دي».

وقال أحمد عبدالوهاب عن زوجته التي أصيبت بالسرطان في 2015 وشُفيت منه عام 2023: «هي بتدعمني جدًا، داليا أنا مقدرش استغنى عنها في حياتي».

واختتم: «وفي أي مرحلة هي الداعم الرئيسي الكبير ورايا والشخص اللي أنا باخد رأيه وبثق في رأيها هي جانب مهم جدًا في حياتي».