أحمد موسى: الحمد لله والشكر لله إحنا في دور الـ 32 بالمونديال لأول مرة في تاريخنا

قال الإعلامي أحمد موسى: الحمد لله والشكر لله، إحنا في دور الـ 32 بكأس العالم 2026، يمكن في ناس مش شايفه أن فيه إنجاز، محصلناش قبل كده.

وتابع خلال تقديم برنامج على مسئوليتي، المذاع على قناة صدى البلد، إحنا أول مرة نروح الدور التاني لأول مرة في تاريخنا وهنقابل منتخب كبير وهو أستراليا.

وأكد: في ناس قالت قبل ما نسافر أمريكا منتخبنا هيبقى حصالة المجموعة في كأس العالم وهيروح المونديال مش هيعمل حاجة ويرجع تاني من دور المجموعات ولا يتأهل.

واستطرد الإعلامي أحمد موسى: في ناس قالوا بعد ما أشقائنا العرب اتغلبوا 5 و6 وكان الكلام ده قبل ماتش نيوزيلندا إشمعنا مصر ما تتغلبش.

وقال إنه كانت هناك ضغوط من الغوغاء على منتخب مصر من الانسحاب من كأس العالم وكان في ضغط على رجالة المنتخب ومحمد صلاح عشان ميلعبوش الماتش، وفي المقابل قالوا منتخب إيران المسلم هدد بالانسحاب ولكنهم متكلموش ولا قالوا كده.

وواصل: أنا كلمت مسئول كبير في البعثة يوم الخميس عن الشائعات اللي كانت متداولة أن في لاعبين هيرتدوا إشارات مش عارف أيه وتكون مش عارف فين وأن اللاعبين هينسحبوا وقالوا إحنا عملنا ده كله عشان ننسحب.

وأكمل: لم يحصل من قبل أن مر علينا دور المجموعات بدون هزيمة وتسجيل 5 هداف وعندنا 5 نقاط، وده إنجاز ومنتخبنا مش عادي، في نسخة 2018 اتغلبنا 3 مباريات والحصيلة صفر نقاط وسجلنا هدفين فقط ونسخة 1990 هدف يتيم فقط.

ولفت الإعلامي أحمد موسى، إلى أن حسام حسن مدرب وطني محترم، وكانوا بيهاجموه ويقولوا خد فلان وما أخدش فلان، الله على شوبير وتصدياته في مباراة إيران، ومحمد صلاح بطل العالم كله يعمل حسابه، وكان في ضغط على منتخب مصر بعد إصابة عبد المنعم في أول المباراة والاضطرار إلى تبديله إلى جانب نعاني من إصابة فتوح.

واختتم أن منتخب إيران مش سهل ومن أقوى المنتخبات في آسيا وترتيبه 21 على مستوى العالم ويغلب معظم منتخبات قارات، ولم يكن أمامه سوى الفوز، ومفيش في كأس العالم مجموعة بسيطة دول 48 منتخب من 200  دولة، ده إيطاليا مراحتش، وإياكم تقللوا من إنجازات منتخب بلدنا واللي عاوز يقلل من الإنجاز يروح بعيد عننا.