أشرف عبدالباقي: عملت شقة عبدالمنعم مدبولي وأحمد رزق ومباخدش ولا مليم

كشف الفنان أشرف عبدالباقي مهنته المفضلة بجانب التمثيل، كما تحدث عن ذكرياته مع الراحلين عبدالمنعم مدبولي، وعلاء ولي الدين.

قال أشرف عبدالباقي عبر تصريحات تلفزيونية: «عبدالمنعم مدبولي، عملت له شقته الأبواب والشبابيك، ولغاية آخر وقته كان بيقابلني ويقولي الله يباركلك، وهو كان نجار شاطر وكان حابب فيا أني راجل بتاع شغل وبمارس هوايتي حتى في الاحتراف وأنا اللي عملت بيت أحمد رزق، ومش بيلاقوا أرخص مني لأني مباخدش ولا مليم، وأنا بخليهم يعملوا كل حاجة وبينفذوا وبيشرفوا على تنفيذ بيوتهم».

وفيما يخص ذكرياته مع الراحل علاء ولي الدين، قال: «كان متقمص شخصية والدته بالشكل وكل حاجة في فيلم الناظر، وكان ارتباطه بوالدته كان فظيع أنا حضرت معاه فترة طويلة، وفي الأواخر لما كان تعبان كان ممنوع من أكل معين فجاتله في أكتر حاجة بيحبها، ووالدته كانت لما تيجي تسخن له الأكل اللي مخصص للتعب كانت تحط له صباعين كفتة».

وتابع أشرف عبدالباقي: «كنت بحب في علاء ولي الدين موهبته وشخصيته وعلاقته مع والدته، وأول معرفتي به كنت في النقابة باخد تصريح لفيلم، وهو كان بياخد تصريح لعمل، وكنت قبلها شوفت له مسرحية وقولتله في حد بيعمل فاكهة حلو وقريب منه وإننا نخرج نتقابل».