أقسم بالله ما قبلتوش.. حجاج عبد العظيم ينفي علاقته بالشيخ صلاح التيجاني

أكد الفنان حجاج عبد العظيم، على عدم معرفته بالشيخ صلاح التيجاني، نافيًا لقائه به من قبل في أي وقتٍ سابق، بعد تداول تعليق له على صورة لـ التيجاني، قائلاً: «كل سنة وحضرتك في الحفظ والأمان والسعادة والنور.. مدد المدد».

وأوضح حجاج عبد العظيم في مداخله هاتفية، قائلاً : «أنا عملت في حياتي أعمال كتير ناجحة وغير ناجحة لكن عمري ما تلقيت مكالمات من الصحفين بالشكل ده، ودا نتيجة البرنامج الشهير (الفيسبوق مش فيسبوك)، الكل بيهبد، مفيش أي حاجة أنا معرفش أي حد ومش من مريدين حد، أنا الوحيد اللي بزوره هو النبي صلى الله عليه وسلم وبزور أهل بيته الحسين والسيدة عائشة والسيدة زينب، ولا عمري روحت زرت حد ولا أخدت بركة من حد ربنا اللي بيبارك في الصحة والرزق والأولاد».

وأضاف حجاج عبد العظيم، قائلاً: «مقدرش أروح لعبد غيري أطلب منه بركة، أنا عندي بتاع 5 آلاف متابع بيفضلوا يتكلموا عن أدواري وبيكلموني عن أعمالي وبرد عليهم بكلمة طيبة زي ما هما قالولي كلمة طيبة، وبقوله بارك الله فيك وكتير خيرك ومدد، والمدد بتاع ربنا مش مدد بتاع حد، أنا مليش علاقة بيه».

حجاج عبد العظيم

وأكد حجاج عبد العظيم، قائلاً: «أنا معرفش الراجل اللي بكلمه تاريخه إيه، واحد كلمني كلمة كويسة ورديت عليه، أنا شايفة راجل جميل ومصدرش منه أي حاجة، لابس عمامة وعنده لحية واحتراما ليه واللبس اللي بيرتديه دا كتبتله لكن أنا أقسم بالله مقابلتوش وإيدي متحطتش في إيده، وحتى لو قابلته إيه المانع هيكلمني كلمتين حلوين على راسي، لكن ياخدني ويتوجه بيا لهدف معين أو سياسة أو طريقة معينة هيكون ليا الحق أني أقبل أو أرفض».