أول تعليق من ياسمين علي بعد احتراق غرفتها وتعرضها لحادث: «متتخدعوش بضحكتي»

كشفت الفنانة ياسمين علي تعرضها لحادثين خلال الأيام الماضية، كادوا أن يعرضهما للخطر هي وأسرتها، وذلك بعد أن احترقت غرفة ياسمين علي مساء أمس الاثنين.

ياسمين علي تروي تفاصيل حادث احتراق غرفتها

قالت الفنانة ياسمين علي عبر حسابها بموقع التواصل الاجتماعي «فيسبوك»: «مبحبش الطاقة السلبية والله بس اعمل ايه طيب، هاحكيلكم حاجة صغننه امبارح الساعه 2 بليل من العادة ببقي قاعدة مع بابا وماما ويحيى بنتفرج على التليفزيون، قمت عشان اروح اوضتي أنام، دخلت الأوضة قعدت دقيقة شامه ريحة بلاستيك محروق ومش فاهمة الريحة جاية من فين».

وتابعت ياسمين علي، حديثها وقالت: «فجأة بدون مقدمات وربنا عالم باللي هقوله لقيت السقف على وسعه مولع نار كله بمعنى الكلمة، وفجأة النار اتشفطت وبقت مختصرة في الشكل اللي انتوا شايفينه ده وقفلنا الكهرباء ورشينا ميه، كل ده في لحظات اتاري الجار من فوق في مية بتنزل من عنده على السقف عندنا فعملت ماس فالكهرباء وحصلت النار اللي شوفتها دي».

حادث سير تتعرض له ياسمين علي وأسرتها

واختتمت ياسمين علي حديثها عن حادث سير تعرضت له منذ أيام، وقالت: «لو مكنتش دخلت الأوضة في التوقيت اللي روحت فيه، الله اعلم كان حصل ايه، وقبلها بكام يوم كنا لسه عاملين حادثة بالعربية مع عربية نقل كبيرة، فمتنخدعوش بالضحك اللي بضحكه، كل واحد له فيلم عايشه، أحمدوا ربنا على كل لحظة أمان انتوا عايشينها بدون ترويع وعدم ستر ومتبصوش لحياة حد ابدًا من بره».

ياسمين علي عن أغنية «نقابل ناس نفارق ناس» : «مكنتش فاهمة يعنى إية تريند» .. فيديو