إنجي علاء تكشف تطورات حالتها الصحية بعد عملية في المخ: فات شهر والتعافي صعب

كشفت السيناريست إنجي علاء تطورات حالتها الصحية، بعد خضوعها لعملية جراحية دقيقة في المخ قبل فترة.

كتبت إنجي علاء في منشور عبر حسابها الشخصي بموقع فيس بوك: «فات شهر تقريبًا والتعافي صعب.. الحمدلله على كل شيء.. في أيام أحسن من أيام وأملي في ربنا كبير.. وفي أيام ناس بتظهر تهونها بشكرهم من كل قلبي».

وتابعت: «أنا كان لازم أعمل العملية أو يمكن أخسر العصب نهائي أو تتعمل العملية وممكن تحصل أضرار لأن العملية في مكان دقيق في المخ والعصب بقاله سبع سنين متضرر بندعي أن المضاعفات تكون مؤقتة يارب يا كريم».

واستكملت إنجي علاء: «محتاجة دعواتكم في الفترة الصعبة دي وشكرًا لكل حد حاول يساعد بأي طريقة ربنا يخليكم وشكرًا لدعواتكم كلكم كل دعوة ليها مكانة كبيرة أوي عندي».

واختتمت: «فترة المرض غيرت نظرتي للأمور.. أكني بقيت شايفة الدنيا من بره.. مافيش حاجة تستاهل القهرة والاستنزاف والله.. احمدوا ربنا على الصحة دي نعمة كبيرة، وراحة البال نعمة، ورضا الله أهم نعمة، والعمر أقصر من إننا نضيعه في الضغط والقهرة والزعل.. ربنا يشفي كل مريض، ويجبر بخاطر كل موجوع، ويرزقنا جميعًا الصحة وراحة البال وطمأنينة القلب».