التفاصيل الكاملة لإصابة أحمد صيام بالسرطان منذ 17 عاما

كشف الفنان أحمد صيام لأول مرة تفاصيل إصابته بالسرطان في الرئة منذ حوالي 17 عامًا، وذلك بسبب كثرة تدخين السجائر.

قال أحمد صيام عبر تصريحات تلفزيونية: «كنت أدخن 6 علب سجائر يوميًا وكنت شره في التدخين وفي لحظة صحيت من النوم لقيت الدنيا مهزوزة صحيًا وقتها خوفت وقررت مشربش سجائر ورميت اللي عندي».

تفاصيل إصابة أحمد صيام بالسرطان

وتابع: «بعدما أقلعت عن التدخين بيوم واحد قررت أذهب للطبيب وأكشف وبعد عمل التحاليل والأشعة فجأة لقيته بيقولي عندك سرطان في الرئة، وزوجة أخويا طبيبة قالت لي لازم ناخد عينة ونحلل ونمشي في طريق العلاج».

واستكمل أحمد صيام: «قلت لها لا هنحلل ولا هنعمل ومتجبيش سيرة لحد وهنسيب الجثة مقفولة لغاية لما نسلمها لأصحابها وذهبت إلى الطبيب وقال لي الورم بتاعك على فص من الفصوص الثلاثة اللي في الرئة اليمين وإحنا هندخل نشيل الفص ده قلت له تمام نعمل العملية ومراتي وقتها عرفت هي وكل أقاربي، ولما اتقال لي عندك سرطان حسيت إني مضغوط وهقع».

وأضاف: «وبعد شوية قلت لنفسي إيه المشكلة أخاف من الموت علشان إيه، عملت الجراحة ووأنا داخل العمليات كنت بضحك وأخدت كيماوي بعد الجراحة وكل 6 شهور بعمل فحص من سنة 2007».

دور رفضه أحمد صيام

كما كشف تفاصيل رفضه تقديم دور الفنان خالد الصاوي في فيلم عمارة يعقوبيان، بسبب بناته، معلقًا: «في السن الصغير الأطفال ساعات يهزروا مع بعض بحاجات الآباء فمكنتش هعرف أنتقي تركيبة أعرف أقدمها في الفيلم».

وأشار الفنان أحمد صيام إلى أنه يقدم في بعض الأحيان أعمالاً دون الرضا عنها بسبب احتياجه للأموال، مضيفًا: «قرايبي في البلد بيفكروا إن الواحد بييجي يقف قدام الكاميرا وياخد شوال فلوس وهو مروح».

وأوضح أنه كان يعمل محاسب قبل الفن، وقام بعد ذلك بتسوية معاشه للتفرغ للتمثيل بشكل كامل، وأضاف: «لغاية النهاردة حسابي في البنك لا يزيد عن 10 أو 15 ألف جنيه، أنا الفلوس بالنسبة لي مصدر للعيش والانبساط، وأخلي ولادي عينهم مليانة».

أحمد صيام

ابنة الفنان أحمد صيام