الرئيس السيسي: ربنا نجانا في 2011 و2013 بوعي المصريين.. فيديو

أكد الرئيس عبد الفتاح السيسي، أن عملية الإصلاح في مؤسسات الدولة تعتمد على نوعية الكوادر التي يتم ضخها داخل هذه المؤسسات، مشددًا على أهمية إعداد جيل جديد بمعايير دقيقة في قطاعات القضاء والداخلية والتعليم، لضمان بناء دولة قوية قادرة على مواكبة التحديات.

وقال الرئيس عبدالفتاح السيسي، خلال تناوله وجبة الإفطار بمشاركة كبار المدعوين في احتفال أكاديمية الشرطة بمناسبة يوم الخريجين: "أنا بتكلم على النوعية اللي أنت عايز تضخها في مؤسسات الدولة، أنت عايز تضخ دم مظبوط في الجيش والشرطة والتعليم، مش بتشتكوا وتقولوا مش عجبنا الإجراء الفلاني؟"، موضحًا أن الإصلاح لا يكون بالشكاوى، بل بالبحث عن أفكار وحلول عملية تترجم التوصيات إلى واقع ملموس.

وأضاف: "تصوروا النهارده بعد 10 سنين، 10 دفعات في القضاء والداخلية والتعليم كلهم بمعايير واحدة، الموضوع ده تحت المتابعة الدقيقة يوميًّا مع المسؤول عن الموضوع، وأنا شايف أن دي الفرصة اللي ممكن يكون فيها إصلاح لمؤسسات الدولة على مدى طويل".

وأوضح: "الفرق بينا وبين غيرنا لما حد بيفكر يقولك هنعمل ثورة للتغيير، الثورة بتاعت التغيير دي تقدر تاخد البلد 50 سنة و100 سنة ورا، ومش هتحقق أهدافها لأن صاحب الثورة مش موجود، هيعيش فترة زمنية محدودة يحقق فيها فكرته، لكن الإصلاح اللي أنا هعمله هبني شخصيات وبشر في كلية الطب والهندسة، ولو حطيتوا إيدكم في إيد بعضكم يا مصريين، كل عميد كلية وكل رئيس جامعة منتبه وبيفني نفسه عشان يطلع جيل قادر، أنتوا هتختصروا الزمن، إذا كان التقدم العلمي أو الاقتصادي بياخد من 50 سنة، لو اتحطت إيدينا مع بعض والقلب مصدق والإرادة مصدقة، هنختصر كتير من الوقت".

واختتم الرئيس السيسي حديثه بالتأكيد على ثلاث ركائز أساسية لبناء الدولة الحديثة وأولها مناخ الحرية الحقيقي قائلًا: "مناخ الحرية الحقيقي دون الإضرار أو فوضى تؤثر على آمن واستقرار البلد دي، والحرية تقف عندما يصل الآمر للإضرار بالآخرين، والنقطة التانية عملية التطوير عملية مستمرة لا تنتهي بجيل أو بعصر أو بقيادة أو بحكومة، والتالتة أن الموضوع ده مرتبط بالشعب المصري ككتلة وربنا نجانا في 2011 و2013 بوعي المصريين ".