الرئيس السيسي: موقفنا الاقتصادي بيتحسن.. ومؤشراتنا هتبقى أفضل.. فيديو

طمأن الرئيس عبد الفتاح السيسي الشعب المصري على كافة الأوضاع في الداخل والخارج سواء على المستوى السياسي أو العسكري.

حفل تخرج دفعة 2025

وقال الرئيس عبد الفتاح السيسي خلال كلمته أثناء حفل تخرج دفعة 2025 من أكاديمية الشرطة: 'بتكلم في مرحلة صعبة بتمر على منطقتنا وظروف قاسية جدًا بتمر وليها تأثير كبير على الاستقرار والأمن في دول كثيرة جدًا بتحيط بينا، لكن بفضل الله تعالى في مصر الوضع مستقر، وبالمصريين وكل المصريين مش بتكلم على مؤسسات دولة بعينها، إحنا على مدى من 2013 حتى الآن واجهنا إرهابًا وظروفًا صعبة وتم التغلب عليها، ومن 2022 حتى الآن الأمور تسير بشكل طيب'.

وأضاف الرئيس السيسي: 'بأكد الكلام ده وبقول أي تحدي وأي تهديد متقلقوش منه، طول ما إحنا مع بعض، كلنا مع بعض، أي تحدي نقدر نتجاوزه، وأي خطر نستطيع التصدي له، وبكررها كتير لأن مفيش حد يقدر يعمل حاجة مع مصر خالص، إحنا عمرنا ما كنا بنتكلم بشكل فيه غلو أو تعالي أو تفاخر خالص، إحنا بنتكلم متواضعين جدًا'.

وأوضح: 'محدش بإذن الله يقدر، بس أنتم يا مصريين، افضلوا مترابطين، وأي تحدي يقابلنا في الأسعار والاقتصاد نستطيع أن نتجاوزه ونتغلب عليه ونعبره بفضل الله وبفضل وحدتكم وصلابتكم وصبركم، نتابع اللي بيحصل في كل حتة في الدنيا مش بس في منطقتنا، وأي دولة في الدنيا بصلابة شعبها بتعدي أي حاجة في الدنيا'.

وتابع: 'موقفنا الاقتصادي بيتحسن يومًا بعد يوم ولسه، وبرضو بالله وبيكم هنتحسن أكتر من كده، ومؤشراتنا هتفضل أحسن من كده، وأنا عمر ما كنت بحاول أو أبالغ أو أقول أوهام، إحنا ماشيين بشكل كويس أوي، وكل يوم بيكون أفضل من الأيام اللي قبل منه، لكن أوعوا تفتكروا أن أي دولة مشاكلها بتنتهي، أمال أنتم فاكرين الأجيال الجديدة مهمتها إيه؟ الشباب والبنات الدنيا كلها قدامهم، وموحدين عشان يغيروا للأفضل ويحسنوا في دراستهم واقتصادهم، وأوعوا تتصوروا أننا في يوم من الأيام نجي نقول إننا خلاص خلصنا، مفيش بلد تقول إنها أنهت وحلت كل مشاكلها، ده تطور طبيعي، ورغم كل الظروف الصعبة اللي مرت على المنطقة من 2020 وحتى الآن، وبصلابتكم بنعبر كل الأمور'.