المخرج عمرو سلامة: بعمل أفلام الجمهور يتفاعل معاها حتى لو شتم

يتواجد المخرج عمرو سلامة، هذه الفترة في مدينة جدة بالمملكة العربية السعودية حيث يحضر فعاليات مهرجان البحر الأحمر السينمائي.

المخرج عمرو سلامة يتحدث عن بدايته

قال المخرج عمرو سلامة أثناء المؤتمر الصحفي الذي أقيم على هامش فعاليات مهرجان البحر الأحمر: 'من بداياتي كنت باصص للسينما إنها وسيلة لتوصيل رسائل معينة'.

وتابع: 'بعد أول أو تاني فيلم ليا بقيت أقاوم الشئ اللي جوايا اللي عايز يعلم الناس حاجة أو يغير فكرهم، فحاولت أفهم إن السينما هي غاية في حد ذاتها مش وسيلة لغاية تانية'.

واستكمل عمرو سلامة حديثه، قائلًا: 'أخر أفلامي شماريخ، حاسس إن الرسالة الوحيدة اللي عايز أقولها للناس إن ادخلوا الفيلم تاني لو عجبكم، مفيش أي رسالة تانية عايز أوصلها، مجرد رحلة ادخلوها واتبسطوا'.

تصريحات المخرج عمرو سلامة

وواصل عمرو سلامة حديثه، وقال: 'لما كنت بعمل أكتر فيلم يصنف فني، زي فيلم أسماء، كان الهدف منه هو مداعبة الجمهور، عايز أبسطه وأخليه يتأثر، ويدخل رحلة ويخرج منها وهو متفاعل معاها'.

وأردف سلامة حديثه عن فيلم أسماء، وقال: 'فيلم زي أسماء كان له جمهور معين، وشماريخ نوع جمهور آخر، فأنا بعمل حاجة عايز الجمهور يتفاعل معاها، حتى لو شتم بس يتفاعل'.

واختتم المخرج عمرو سلامة كلامه، وقال: 'لو عليا أعمل كل الأنواع أعمل ميوزيكال ورعب وكله، وفي فرق بين الأفلام اللي أنا عايز أعملها وبين الأفلام اللي أُتيح ليا إني أعملها، والفيلم عشان يتصنع محتاج عوامل كتير مع بعض، ودايما بقول إن إنتاج أي فيلم هو صدفة كونية، وإنه يطلع فيلم حلو دي صدفة أكبر، وعندي في دماغي مش أقل من 10 أفلام أكشن عايز أعملهم'.