الموسيقار محمد نزيه ينتقد اعتذار محمد سلام عن مسرحيه: أنا دفنت أبويا ورجعت الاستوديو اشتغل

دينا دهب 26 أكتوبر 2023 | 03:10 مساءً

انتقد الموسيقار محمد نزيه اعتذار الفنان محمد سلام عن مشاركته في بطولة مسرحية زواج اصطناعي، المقرر عرضها ضمن فعاليات موسم الرياض الترفيهي.

الموسيقار محمد نزيه ينتقد محمد سلام

وكتب الفنان محمد نزيه، عبر حسابه بموقع التواصل الاجتماعي فيسبوك، وقال: 'الفنان المحترم جدًا أستاذ محمد سلام.. احترم موقفك جدًا ولكن عندي تعقيب بسيط'.

وتابع: 'صحيح كان ممكن العرض يتأجل لحد ما الأوضاع تهدى، لأن ما يصحش إخواتنا يموتوا، وإحنا نهزر ونضحك معاك جدًا وأحترم قرارك، بس لو عاوز الحق، اللي يُلام هنا اللي ناوي يقطع تذكرة ويخش يتفرج، مش حضرتك لأن دي شغلتك'.

واستكمل نزيه حديثه، وقال: 'أنا مثلًا أبويا مات ودفنته، ورجعت الاستوديو أقيس طبقة لمطرب، عشان ورانا شغل، وفي تسجيلات وعقود وفلوس ناس'.

تعليق الموسيقار محمد نزيه

واختتم حديثه، وقال: 'متنساش كمان أن في وراك فريق محتاج يشوف شغله عشان وراه التزامات، حقيقي موقفك راقي جدًا بس كان ممكن يترجم بكذا طريقة، منهم مثلًا إنك تخصص أجرك لصالح الضحايا، أو تُعلن احتجاجك على المسرح، وهذا ما يسميه الإسلام أضعف الإيمان.. كامل احترامي لموقفك النبيل، وأشكرك على تعليمي كيف تكون مواقف الرجال'.

محمد سلام يعتذر عن موسم الرياض

وعلى جانب أخر أعلن الفنان محمد سلام اعتذاره عن المشاركة في موسم الرياض 2023، من خلال مسرحية زواج اصطناعي بسبب الأحداث في غزة وفلسطين الحالية.

ظهر محمد سلام في مقطع فيديو عبر حسابه الرسمي بموقع انستجرام، أعلن خلاله الاعتذار عن المشاركة في موسم الرياض، قائلًا: «السلام عليكم ورحمة الله إن شاء لله المفروض أسافر الرياض عشان أعرض مسرحية زواج اصطناعي في موسم الرياض».

وتابع: «والمفروض إنها مسرحية كوميدية وفيها أغاني واستعراضات والمفروض إننا نعرض إن شاء الله يوم 30 أكتوبر.. هنعرض في وسط الأحداث اللي بتحصل في غزة فأنا مش متخيل إني هروح أعمل مسرحية وأهزر وأرقص وأخواتنا في فلسطين عمالين يتقتلوا ويتدبحوا ومفيش حاجة بتحصلهم».

واستكمل الفنان محمد سلام: «أنا مش هقدر أسافر طبعًا وليه بقول الكلام ده في آخر لحظة المفروض إني أسافر بكره إن شاء لله لأني كنت على أمل أن الموسم يتلغي أو يتأجل مثل مهرجانات الجونة والقاهرة أو الموضوع يهدأ في فلسطين».

مي عز الدين مسرحية زواج اصطناعي

محمد سلام مسرحية زواج اصطناعي

وقال أيضًا: «ونقدر نعرض لكن مفيش حاجة بتحصل لحد دلوقتي في ناس عمالة تموت ومفيش حاجة بتحصل، فأنا إزاي أروح أعرض وناس بتموت في فلسطين، حاسس لو أنا عملت كده هبقى كأني زي اللي بقتلهم بالظبط، هبقى خذلتهم وهبقى بغني وارقص».

وأضاف الفنان محمد سلام: «فأنا بعتذر عن المشاركة في موسم الرياض واللي بيحصل في فلسطين قضية كل مسلم، وواجب على كل مسلم، فأنا مش في إيدي حاجة أقدر أقدمها، فلما نموت وربنا يسألنا عملت إيه لأخوك في فلسطين أنا هرد أقول إيه؟.. هقول في وقت الأحداث في فلسطين أنا كنت بعمل مسرحية كوميدية وبرقص وأغني فأنا مش هقدر أعمل كده».

واختتم:«كان عندي الموسم يتأجل أو يتلغى، فأنا مش هقدر أشارك في المهرجان ده وحابب أقول إني كنت في مشكلة مش عارف أسافر ولا أعمل إيه؟ والتمثيل هو أكل عيشي، لكن لو مسافرتش هل هموت من الجوع؟ بالتأكيد لا».