"الورث فرقنا".. إخوة يتحولون من عائلة إلى خصوم في ساحات المحاكم.. فيديو

لم يكن يتخيل أن تتحول ذكريات الطفولة والعيش تحت سقف واحد إلى قاعات محاكم وأقسام شرطة، حيث يقف الإخوة وجهاً لوجه بسبب الميراث، بين أحكام بالسجن وخوف على العائلة، لتصبح القصة نموذجًا مؤلمًا لكيف يمكن أن يتحول الخلاف إلى مأساة إنسانية تهدد الجميع.

وقال خلال لقائه مع الإعلامية نهال طايل في برنامج 'تفاصيل' المذاع على قناة 'صدى البلد2': 'إحنا 5 إخوات، 2 من أم و3 من أم، وبعد وفاة الوالد بفترة إحنا قعدنا فترة كبيرة، الوالد متوفي سنة 88، إحنا تربينا مع أخويا الكبير ده كأنه أب هو اللي احتضننا وهو اللي كبرنا وكل واحد بقى له بيت'.

وأضاف الأخ المكلوم: 'وقفنا عند الورث، عاوزين نحدد نعرف لينا إيه علينا إيه، قال لا محدش له حاجة، والحاجة دي بتاعتي وأنا أدي منها اللي أنا عاوزه في الوقت اللي أنا عاوزه، محدش يلزمني بحاجة'.

وتابع: 'أخويا شخص عنيد وعنده شوية كبر، وصلنا لنقطة الخلاف، وحد أشار إليه بقصة إنه يحبسنا، وكل واحد جابله حكم حبس 10 سنين وأنا جابلي 12 سنة، وبدأت أثبت إن الورق ده مزور، ولما أثبت ده جه عليه إدانة، وخد 15 غيابي وبعد كده 10 حضوري'.

وأكمل: 'إخواتي تعبانين، واحد عنده قلب وواحد ضغط، هل هيستحملوا السجن؟، الأسر اللي بره دي، عيالي وعيال إخواتي، كل واحد معاه 4 أو 5 عيال، النتائج هتبقى إيه؟'، ومفيش حد فينا كسبان، كلنا خسرانين'.

وأضاف: 'أنا شايف إن اللي جاي أسوأ من اللي إحنا فيه، والحل هو الصلح، مفيش حل يحل الموضوع ده غير الصلح'.