باسم يوسف من منتدى مصر 2026: أتمنى السوشيال ميديا ماتفسدش حياتنا وأرجع أزور المتحف وآكل مانجا عويسي

شهد منتدى مصر 2026 بالعاصمة الجديدة بحضور الرئيس عبدالفتاح السيسي، ظهور الإعلامي باسم يوسف.

قال باسم يوسف في كلمة مسجلة عن بعد: «عاملين إيه وحشتوني.. أخباركم إيه في مصر.. أنا في وسط الجولة بتاعتي وطالع أعمل عرض بعد شوية فبعتذر عن اللغبطة والبعد ده».

وتابع: «السوشيال ميديا كانت سبب نجاحي وشهرتي وأحيانًا كانت برضه سبب مشاكل كتير حصلتلي.. وزي ما هي مفيدة ليا ولملايين الناس حوالين العالم الواحد ابتدى يشوف جوانب تانية بتأثر على حياتنا اليومية بطريقة مش لطيفة بتأثر على علاقاتنا مع بعض مش إنتو ساعات بتخشوا السوشيال ميديا وبتحسوا فجأة لما تتناقشوا وتكتبوا إن ضغطك علي ونرفزتك زادت وعمال تتخانق مع دبان وشك».

واستكمل باسم يوسف: «وناس مكنش عندك معاهم أي مشكلة ابتديت تقلب تكرههم تحملهم كل المشاكل اللي حواليك كلنا شوفنا الموضوع ده.. فجأة ماتش كورة يقلب بشتيمة بيننا وبين إخواتنا في المغرب.. حاجة حصلت في مصر لضيوفنا لإخواتنا من سوريا والسودان فجأة نصحى نلاقي نفسنا ماسكين فيهم وهما ماسكين فينا.. من غير مناسبة هوب تلاقينا ماسكين في إخواتنا في السعودية».

واختتم باسم يوسف: «إحنا بقينا عارفين.. عارفين الحسابات اللي هي ولا مغربية ولا مصرية ولا سعودية هي اللي بتخش تولع الدنيا وتوسع الخلاف وتوسع الكراهية.. أنا سافرت وشوفت بعيني الحب اللي ما بين أهلنا في الدول العربية والبلاد الأوروبية.. آلاف الناس من كل الجنسيات بيحضروا حفلاتي وماشفتش منهم إلا كل حب وتلاحم وراحة وونس.. محتاجين إن مانخليش الخلافات دي تفرق بيننا وتكبر أكبر من كده.. عارف إن إحنا بنهرب ساعات من حياتنا وبنقضي ساعات على السوشيال ميديا لكن أتمنى السوشيال ميديا ماتفسدش علينا حياتنا.. وحشتوني أشوفكم قريب وإن شاء الله أزور المتحف المصري وأرجع أعمل كايت سيرفينج وآكل مانجا عويسي».