بسمة بوسيل تكشف تفاصيل جديدة عن مرض ابنها: مشاكل كبيرة وجراحة إضافية

كشفت الفنانة بسمة بوسيل تطورات جديدة في حالة ابنها آدم، وتفاصيل الأزمة الصحية الصعبة التي مرّ بها.

قالت بسمة بوسيل عبر تصريحات تلفزيونية: «اللي حصل كان جديد علينا كلنا، حتى الأطباء كانوا متوقعين أن الموضوع له علاقة بالأكل، لكن للأسف كانت الزايدة الدودية هي السبب، وتامر حسني وقتها نصح الناس بالحذر لأن التهاب الزايدة يمكن يكون خادع جدًا خصوصًا عند الأطفال وتشخيصه صعب، وإذا انفجرت تسبب مشاكل كبيرة».

تفاصيل أزمة آدم نجل تامر حسني وبسمة بوسيل

وتابعت: «آدم تعب فجأة وكانت الأعراض مش واضحة، ما كناش عارفين هل ده تسمم أو مشكلة في البطن، للأسف الزايدة انفجرت، وده سبب مشاكل كبيرة زي التصاقات في الأمعاء، وبعضها بيحتاج تدخل جراحي تاني، الجراحة الأولى كانت لتنظيف الصديد، لكن الحالة تطلبت جراحة إضافية بعد 48 ساعة، والأطباء كانوا مستنيين استجابة من الجسم بس للأسف محصلتش».

واستكملت بسمة بوسيل: «واضطروا لفك الالتصاقات يدويًا، كانت فترة صعبة جدًا علينا، لكن الحمدلله آدم بيتحسن دلوقتي، ولسه فاضل حوالي 10 أيام بعد آخر عملية عشان يقدر يتواصل مع الناس، مناعته ضعيفة حاليًا، لكنه خرج من المستشفى وبياكل وبيتحرك، والتحسن واضح حتى لو بكميات قليلة».

تصريحات بسمة بوسيل عن ابنها

واختتمت قائلة: «حسيت قد إيه الشهرة ممكن تكون نعمة، خاصةً في الأوقات الصعبة، الناس وقفت جنبنا بكلامها وحنانها سواء يعرفونا أو ما يعرفوناش. حسيت إني مش لوحدي، ويارب ما يشوف حد حاجة زي دي في ولاده أو نفسه».