بعد مكالمة صدفة.. دعاء فاروق تكشف كواليس زيارتها لمحمد منير في منزله

كشفت الإعلامية دعاء فاروق كواليس زيارتها للكينج محمد منير، بعد مكالمة هاتفية جمعتهما بالصدفة.

نشرت دعاء فاروق مجموعة من صور وفيديوهات تجمعها بالكينج محمد منير، أثناء زيارتها له في منزله، وذلك عبر حسابها الرسمي بموقع انستجرام.

زيارة دعاء فاروق للكينج محمد منير

وعلقت على الصور، قائلة: «علي غرار الصوت الشهير اللي بيقول أنا طلعت في التلفزيون.. أنا ممكن أعمل صوت بنفس الانبساط والدهشة بيقول أنا زورت الكينج محمد منير في بيته!!!.. وعشان متحتاروش وتقولوا إيه اللي جاب القلعة جنب البحر الموضوع ببساطة إن ريهام إبراهيم صديقتي الجميلة كانت بتزورني إمبارح للاطمئنان على ديدو ابني».

وتابعت دعاء فاروق: «وفي وسط القعدة تركتها ودخلت المطبخ.. وإذا بروكي بنوتي جت تقولي الحقي يا ماما ده ريهام بتكلم محمد منير في التليفون عادي.. قلت لها اه يا روكي ما ريهام من أصدقائه المقربين جدًا منذ سنوات طويلة ودخلت على ريهام وقلت لها كواحدة مصرية أصيلة ممكن تحشر نفسها في مكالمة لا تخصها بتاتًا سلميلنا عليه يا ريهام وقوليله إن كلنا بنحبه».

تصريحات الإعلامية دعاء فاروق

واستكملت: «واعتقد ده العادي بتاع أي كائن مصري سامع صوت محمد منير طالع من السماعة اللي جنبه.. فإذا بريهام تقول له طب خد دعاء فاروق عاوزة تكلمك وكانت مفاجأة لطيفة لأنه لطيف جدًا جدًا لدرجة إني لما بقول له على فكرة جوزي بيحب يسمعك جدًا وفعلا هو مطرب عماد المفضل قال لي بمنتهي اللذاذة (الله الله) خلصت المكالمة بكلمات الثناء اللطيفة وأنهيتها بإن شاء الله تيجي فرصة وأشوف حضرتك قريب».

وأضافت الإعلامية دعاء فاروق حديثها عن كواليس زيارتها لـ محمد منير: «فكانت المفاجأة أنه قال لي اتفضلي نوريني مع ريهام بكرة.. نجم كبير وقيمة كبيرة وعلى قدر نجوميته على قدر تواضعه ولطفه الشديد في استقبالنا وفرحت جدًا لما قال لي أنه اتفرج عليا النهاردة الضهر في برنامجي».

واختتمت: «في الصورة ريهام إبراهيم اللي بشكرها بجد على المفاجأة والزيارة الحلوة دي.. وعازفة الهارب الجميلة ياسمين حربي اللي اتعرفت عليها من خلال ريهام إبراهيم من سنتين وحبيتها جدًا جدًا.. 5 مايو 2025 يوم أحب أوثقه يوم زيارة الكينج محمد منير».

 

View this post on Instagram

 

A post shared by Doaa Farouk (@doaafarouk)