تصريحات أحمد مالك في مهرجان الإسكندرية: التمثيل شغفي.. ومابقيتش مهتم بالأعمال العالمية 

أعرب الفنان أحمد مالك عن حبه الكبير لمهنة التمثيل، مؤكدًا إنها مش بس شغف حياته، لكن كمان مصدر رزقه اللي بيحمد ربنا عليه.

قال مالك، خلال جلسة 'ماستر كلاس' بمهرجان الإسكندرية للفيلم القصير: 'التمثيل بالنسبالي شغف عظيم، وربنا كرمني إني بشتغل في حاجة بحبها وباخد عليها مقابل مادي'.

وأوضح مالك إنه رغم اندماجه الشديد مع الشخصيات اللي بيقدمها، إلا إنه مابيعيش جو الدور بعد انتهاء التصوير، وقال: 'لسه موصلتش لمرحلة إني أعيش الشخصية بالكامل زي بعض الممثلين الأمريكان.. ساعات بتفضل معايا لزمات أو لهجة، بس مش بتسيطر عليا بعد التصوير'.

أحمد مالك

وعن أسلوبه في التحضير للأدوار، أكد: 'التحضير بالنسبالي مستمر لحد آخر ثانية قبل ما المخرج يقول (أكشن)، وقتها بعيش تفاصيل الشخصية كلها'.

وأشار كمان إنه شايف إن أهم حاجة للفنان مش السوشيال ميديا ولا شكله، بل شطارته قدام الكاميرا، وقال: 'التسويق الحقيقي للفنان إنه يدخل الكاستينج متمكن.. الشكل والسوشيال ميديا مكملين بس مش الأساس'.

أما عن شعوره بعد التكريم، فقال مالك: 'كل تكريم بيزود إحساسي بالمسؤولية.. حسيت إنه تعويض ربنا ليا على المجهود اللي بذلته'.

أحمد مالك

وتكلم مالك عن بداياته وطريق أي فنان شاب، وقال: 'في الأول بتجري على اختبارات التمثيل، بعدين تبتدي يترشحلك أدوار، ومع الوقت تقدر تختار'.

وكشف مالك إنه مؤمن بأهمية المسرح في صقل موهبة الفنان: 'المسرح هو الأساس.. زي لاعب الكورة لازم يفضل يتمرن عشان يحافظ على مستواه'.

أما عن رأيه في المشاركة في الأعمال العالمية، قال مالك بوضوح: 'زمان كانوا بيحصرونا في أدوار الإرهاب، ودلوقتي بقينا محصورين في أدوار اللاجئين، بعد اللي بيحصل في فلسطين، مبقتش مهتم أشارك في مشاريع عالمية، وحابب أركز دعمي للفن في مصر والوطن العربي وأسرتي'.

أحمد مالك

وحكى عن كواليس فيلم '6 أيام' اللي شارك فيه، وقال: 'اشتغلت مع كريم شعبان، وكان فيه مدرب تمثيل عشان يساعدنا نقدم الشخصيات بمراحل عمرية مختلفة.. التجربة دي فرقت معايا قوي'.

وكشف مالك عن نصيحة مهمة أخدها في بداياته: 'المخرج شريف عرفة قالي لازم تقرأ أدب كتير.. لأن الأدب بيغذي الخيال والوعي الداخلي'.

أحمد مالك

واختتم مالك كلامه بالحديث عن الشهرة المبكرة والصعوبات اللي واجهته: 'لما كنت صغير، الشعبية كانت صعبة نفسيًا.. بس ربنا عوضني بزمايلي اللي دعموني، المشوار دايمًا بيبدأ بمآسي، وأحمد ربنا على كل اللي مريت بيه'.