تصريحات عبير الشرقاوي المثيرة للجدل: الوسط الفني بيكره المحجبات.. وأبويا متكرمش زي ما يستحق

تحدثت الفنانة المعتزلة عبير الشرقاوي في ظهور نادر، خلال مداخلة هاتفية مع برنامج تفاصيل على قناة صدى البلد 2، عن كواليس قرارها بارتداء الحجاب، وعلاقتها بوالدها الراحل المخرج جلال الشرقاوي، كما فتحت قلبها للحديث عن مواقف إنسانية وفنية، ووصفت تجربتها في الوسط الفني بـ'الصعبة'، مؤكدة أنها حاليًا أكثر راحة ورضا عن حياتها.

نستعرض أبرز 6 تصريحات صريحة وجريئة لعبير الشرقاوي، وإليكم التفاصيل

الوسط الفني بيكره المحجبات

عبير قالتها بصراحة: 'الوسط الفني مش بيتقبل فكرة الحجاب، والتمثيل بالحجاب مش سهل'، وأشارت إلى أن عدد الفنانات اللي استمروا بالحجاب قليل جدًا، زي عفاف شعيب ومنى عبد الغني.

وأكدت أن بعض الناس بيستعينوا بالحجاب في مشهد أو اتنين عشان يمثلوا الواقع، لكن الاستمرار بالحجاب 'الحقيقي' مش مرحب بيه في الوسط.

عادي جدًا التردد في الحجاب.. وربنا يقوي حلا شيحة

عن تردد حلا شيحة في مسألة ارتداء الحجاب، علقت عبير: 'ده شيء طبيعي جدًا، حتى أيام الصحابة كان في ناس ارتدوا عن الإسلام ورجعوا، والفتنة ممكن تيجي لأي حد، المهم الرجوع لربنا بقلب صادق'.

أبويا عمره ما غضب عليا.. بس زعل لما اتنقبت

نفت عبير ما تردد عن وجود خلاف بينها وبين والدها بسبب الحجاب، وقالت إن جلال الشرقاوي عمره ما غضب منها، لكن زعل منها لما ارتدت النقاب لأنه كان شايفه تطرف، وفعلاً خلعته احترامًا له، مع تمسكها بحبها ليه ومكانته الكبيرة في حياتها.

جلال الشرقاوي مكرموش زي ما يستحق

قالت عبير إن والدها ماخدش التكريم اللي يستحقه رغم تاريخه الكبير، لأنه كان 'بيحب يقول الحق، وما بيجاملش'، وده خلاه مختلف عن ناس كتير في الوسط، ومش بيكسب ودهم.

مش هرجع للتمثيل إلا بشروطي

رغم استبعادها فكرة العودة للفن حاليًا، إلا إنها ما قفلتش الباب تمامًا، وقالت: 'لو جالي دور بالحجاب ومفيهوش مشاهد فيها لمس أو حضن، ممكن أوافق.. أنا شايفة إن الفن مش حرام، بس في خطوط حمراء مش ممكن أعديها'.

أنا دلوقتي مرتاحة أكتر.. وبحب أسمع تفسير القرآن

أكدت عبير إنها حالياً مرتاحة في حياتها بعيد عن أضواء التمثيل، وبتقضي وقتها مع ابنها، وبتحب تسمع تفسير القرآن، وبتتابع بعض المسلسلات، وقالت: 'لو هقارن بين دلوقتي وأيام التمثيل، فأنا دلوقتي أفضل بكتير'.