حاتم صلاح يكشف أسراره: أهلي صعايدة هربوا إلى الإسكندرية بسبب الثأر

كشف الفنان حاتم صلاح العديد من الأسرار في حياته الشخصية والفنية، حيث أوضح أن أسرته سافروا من الصعيد إلى الإسكندرية بسبب الثأر.

وأوضح الفنان حاتم صلاح في تصريحات تلفزيونية له، أنه تعرض للعديد من الصعوبات وبعض الإهانة والمواقف الحرجة من أجل الدخول في عالم الفن والتمثيل.

بدايات حاتم صلاح

قال الفنان: «في فترة طفولتي المصيف بالنسبة لنا كان إسكندرية، لأن أهل أمي صعايدة عليهم تار، فكنا بنروحلهم إسكندرية دايمًا، ومريت بصعوبات كتير منها مرة منتج فني عايز يعملي عقد عمل برقم أقل فلما اتكلمنا قال ما إحنا هنأكله كمان».

واستكمل حاتم صلاح قائلًا: «وفي مسلسل تاني مشيت منه، رغم أنه كان فرصة مهمة بالنسبة لي لأني مكنتش عارف أخد الورق كامل، بيدوني المشاهد قبل التصوير ومكنوش عايزين يفهموني أن دوري كبير عشان الفلوس ووصلت لدرجة أنهم بيخبوا الورق في التلاجة».

تصريحات الفنان حاتم صلاح

وأضاف: «اشتغل بمجهودي وبعت حاجات كتير، أفضل ما أروح أستلف فلوس عشان محدش يهيني، مكنش عندي حاجة أخسرها ومكنتش عايز حد يقولي كلمة تضايقني حتى من أهلي».

كما تحدث الفنان حاتم صلاح عن كواليس تعاونه مع الفنان أحمد مكي في مسلسل الكبير أوي، قائلًا: «صاحب جدع جدًا واتعلمت منه كتير، والناس مرتبطة بشكلي بالباروكة، وفي ناس فاكرة إن دا شكلي الحقيقي من كتر ما ارتبطوا بالشخصية».

وحرص على أن يوجه رسالة للشباب، قائلًا: «مهما كان الوقت أو السن ممكن تنجح في حياتك، لأن الاجتهاد بيسبق الموهبة، خصوصًا لما بتشتغل لحد أخرك، أنا لفترة قريبة كنت باخد المصروف من والدي.. ولما بخاف من المستقبل، بقول الموضوع مش مستاهل وبدخل على أكونتات الشباب الصغيرين زمايلنا اللي توفوا، وأقول الحياة مش مضمونة إحنا في رحلة ولازم نسيب فيها آثر كويس فقط».

حاتم صلاح

عدم زواج حاتم صلاح

وفيما يخص سر عدم زواجه حتى الآن، موضحًا أن ذلك بسبب انشغاله بالفن، معلقًا: «أنا عبارة عن مشروع، محتاج حد يا يكبر المشروع يا يهده، حبيت في الجامعة وبعدها اضطريت إني اشتغل حاجات تانية غير الفن، لكن مستحملتش فسيبنا بعض، أنا حاليًا ممكن أتجوز بس مبقاش عندي خُلق أتكلم في التليفون وأخرج.. أنا عايش مع الكلاب، علموني الرحمة والتسامح، عندي كلبتين بيناموا جمبي على السرير».

وأضاف الفنان حاتم صلاح: «وفي واحدة منهم أخدتها معايا المسرح، كان عندي كلاب كتير بيتجوزوا ويخلفوا، وكنت بضطر أنضف البيت بشكل كبير بسببهم، وكنت لازم أرضع الكلاب الصغيرة منهم كل ساعتين».

أسرار حاتم صلاح

وأشار إلى أنه عمل في بداية مشواره الفني مساعد مخرج، وبدأ يتطرق في الوسط حتى أصبح نجمًا يشارك في العديد من الأعمال، لافتًا إلى أنه رفض الاستسلام في البداية والتنازل عن حلمه.

وقال: «اشتغلت في البداية مساعد مخرج، ومن أهم أعمالي كان مسلسل صاحب السعادة، مع الزعيم والفنانة لبلبة، وجمعني بها الكثير من المواقف واتعلمت منها كتير، كنت قبل الأوردر بقعد معاها أحفظها المشهد كله في ساعتين، وكنت بنبهر بأستاذ عادل إمام وكنت بعرف أني ممثل شاطر من جمهور المسرح».

واختتم: «لأني من جيل نجوم مسرح مصر، مصطفى خاطر وعلي ربيع وغيرهم، وفكرت أشتغل شغل عادي لما أتخرجت، لكن لما وقفت على المسرح، وشوفت الجمهور قلت أنا هسيب كل حاجة، هنتمي للفن حتى لو هموت من الجوع، وبعدها اشتغلت مساعد مخرج».

حاتم صلاح

حاتم صلاح