حسام موافي ينتقد ثقافة "على قد فلوسهم": الرجولة في العطاء والصبر نعمة

انتقد الدكتور حسام موافي، أستاذ طب الحالات الحرجة بكلية طب قصر العيني، ثقافة بعض العاملين الذين يربطون مستوى أدائهم المهني بقيمة الراتب، مؤكداً أن الكرامة الحقيقية تكمن في العطاء والرضا، وليس في التذمر.

وخلال حديثه في برنامج "ربي زدني علمًا"، المذاع على قناة صدى البلد، روى حسام موافي موقفًا وصفه بالغريب قائلاً: "أنا وداخل أصور في الأستديو في زميل قال لصاحبه يلا اشتغل، قاله أنا شغال على قد فلوسهم، أنا أول ما سمعت الكلمة دي صعقت، أنت بتقول إيه، لو مش عاجبك المرتب سيب المكان وفي غيرك ممكن يدي المكان بنفس المرتب، لازم تشتغل بإخلاص".

وأضاف موافي: "الإنسان في كرامته، ودا معناها إن الراجل دا بعيد كل البعد عن شكر ربنا"، مشددًا على أن من لا يرضى بقيمة الراتب المتفق عليه، عليه أن يترك العمل لمن يقدّره ويؤديه بإخلاص، موضحًا: "أنت لو مش عايز المرتب دا، سيب المكان، وفي حد مكانك هيجي يشتغل بنفس المرتب أو أقل، ويدي المكان كل جهده، يا ابني الإنسان في كرامته، والرجولة في العطاء، لازم تصبر".

وأشار إلى أن المال ليس دائمًا وسيلة للسعادة أو الصحة، وقال: "ممكن يكون معاك فلوس كتيرة، بس ممكن يكون عندك مرض مش هتتعالج منه، هنا لازمة الفلوس إيه؟"، مضيفًا: "يا ابني عكس نعمة الشكر الكفر، لازم ترضى بالمقابل اللي انت متفق عليه".

واختتم موافي حديثه بالتأكيد على أهمية الالتزام بالواجبات الدينية والمهنية على حد سواء، قائلاً: "هل ربنا هيساوي اللي مش صلي العشاء، مع اللي بينكر وجود ربنا؟ اللي بيصلي لازم يقوم بالعمل المفروض عليه، العمل دا فرض عليه، أقسم بالله أنت الخسران، أوعى حد يردد كلمة على قد فلوسهم".