حمزة نمرة يوجه رسالة لجمهوره بعد طرح ألبومه الجديد: ربنا اداني أكتر مما أستحق.. بشكركم من قلبي

رد الفنان حمزة نمرة على سؤال اعتاد سماعه في لقاءاته التلفزيونية حول ما إذا كان يشعر بأنه لم يأخذ حقه فنيًا، موجها رسالة شكر وامتنان لجمهوره الذي ساعده على تصدر الترند بعد طرح ألبومه الجديد «قرار شخصي».

وكتب نمرة عبر حسابه الرسمي على إنستجرام: "زمان، لما كان حد يسألني في أي لقاء: هل حاسس إنك مش واخد حقك فنيًا؟ كنت بأفكر شوية وأكون مش متأكد من الإجابة، وغالبًا بأكون أقرب لفكرة إني فعلًا كده، لحد ما سألت نفسي السؤال ده بجد، واكتشفت إن ربنا إداني أكتر مما أستحق، ووصلني لأبعد مما يفترض أوصل له بالورقة والقلم".

وأضاف: "واحد ماشي عكس التيار، لا بيغني شبه الرائج، ولا بيعمل موسيقى شبه الرائج، ولا بيلبس شبه الرائج، ولا بيفرض نفسه بالزن، وفوق ده كله انطوائي وما بيعرفش يخلق معارف في مجاله، المفروض أكون على الهامش، لكن اللي بأقدمه انتشر بالشكل ده، وألبوماتي بتنافس في موسم الصيف.. ده فضل من ربنا كبير جدًا".

واختتم حمزة نمرة رسالته لجمهوره قائلًا: "باشكركم إنكم سبب في النجاح ده، كل واحد سمعني أو حضر لي حفلة أو نشر أغنية ليا.. ربنا جعلكم سبب في إن فني يفضل عايش.. وأخيرًا أشكركم من قلبي.. ماشي على الله".

كان الفنان حمزة نمرة قد طرح مؤخرًا الدفعة الأخيرة من ألبومه «قرار شخصي» عبر «يوتيوب» والمنصات الموسيقية، والتي تضمنت 4 أغانٍ هي: «كايرو»، «مابتلاقينيش»، «كده الأيام»، و«قرار شخصي رقم واحد».