رانيا محمود ياسين تنتقد السوشيال ميديا وتستعين بأزمة السقا ومها الصغير

علقت الفنانة رانيا محمود ياسين على سلبيات مواقع التواصل الاجتماعي، واستعانت في حديثها بأزمة الفنان أحمد السقا وطليقته الإعلامية مها الصغير.

كتبت رانيا محمود ياسين في منشور عبر حسابها الرسمي بموقع فيس بوك: «نفسي تسكتوا شوية ودع الخلق للخالق نفسي تفهموا من 99% من اللي بيتصدر على السوشيال ميديا حلو أوي وحش غلط أو مستفز أو عايزك تشتم الشخصيات العامة علشان تكره عشيتك وتشوفهم دايمًا ناس مايعرفوش ربنا أو نرجسيين أو متربوش أو مغرورين».

تصريحات رانيا محمود ياسين

وتابعت: «وده مقصود وعن عمد علشان الفنانين مثلا بعد ما كانوا قوى ناعمة ومؤثرين يبقوا الناس المفضوحين محدش منهم يبقي قدوة ولا رمز ولا قيمة مؤثرة زي زمان، محدش سأل نفسه ليه زمان الفنان كان قدوة ومؤثر لأن مكنش فيه أداة مدمرة اسمها السوشيال ميديا وكان في حاجه كيوت أوي بالنسبة دلوقتي اسمها الصحافة الصفرا بس عمرها ما كانت مؤثرة بلونة وبتفرقع وتخلص لكن الهري دلوقتي لازم يدخل في أسبوع كحد أقصى».

واستكملت رانيا محمود ياسين: «نفسي تبطلوا تصدروا أحكام من السوشيال ميديا لأن والله أداة كاذبة بكل صفحاتها ومانشتتها المستفزة فيديوهاتها اللي بتتقال بأصوات ناس مجهولة عايزة تعمل ريتش وفلوس على حس سمعة الفنانين ومعظم النقل كاذب فيما عدا لايف وبعض الصحفيين المتخصصين اللي بيحاولوا يقولوا الحقيقة في وسط كم الزيف اللي بيتصدر على سبيل مثال السقا ومها الناس مش رحماهم».

تعليق رانيا محمود ياسين على أزمة أحمد السقا ومها الصغير

واختتمت: «سيبهم في حالهم ارحموا أولادهم كلنا عندنا بيوت ومشاكل وأولاد بنخاف على شكلنا وشكلهم بطلوا تصدروا أحكام ادعوا ربنا يهدي الأمور يصلح الأحوال بدل الهجوم طول الوقت عليهم وعلى غيرهم وذكري لسقا ومها لأن ده موضوع الساعة وربنا يهدي يارب ويرحمنا من هذه الأداة التي تدمر القيم والرموز.. محدش يقولي وإحنا مالنا أنتم اللي بتصدروا حياتكم هرد وأقولك لأ السوشيال ميديا بتحاصر حياتنا وبنتصور طول الوقت حتى من غير ما نعرف وبتزيف معظم الحقايق وبتديها أكبر من حقيقتها ده غير اللجان المدفوعة وكفاية كدة».