ريهام عبد الغفور : «2022 عاملة زي غرفة 207 ومكنتش متخيلة اللي حصل»

تحدثت ريهام عبد الغفور عن عام 2022 الذي تألقت خلاله بأكثر من عمل فني ناجح، قائلة: «الحمد لله ربنا كرمني السنة دي بزيادة، في ثلاثة مسلسلات وش وضهر ومنعطف خطر والغرفة 207».

تصريحات ريهام عبد الغفور

قالت الفنانة ريهام عبد الغفور عن أعمالها في 2022: «كلهم اتصوروا على فترات متباعدة ومكنتش متخيلة إنهم هيتعرضوا ورا بعض ويعملوا النجاح ده».

تابعت ريهام عبد الغفور في تصريحات إذاعية لها: «كنت قلقانة الأول وخايفة الناس تزهق لما تشوفني كتير، بس لما المسلسلات اتعرضت ورا بعض بأدوار مختلفة، عملوا رد فعل إيجابي جماهيريًا ونقديًا بشكل فاق توقعاتي».

واستكملت الفنانة ريهام عبد الغفور قائلة: «أنا طول الوقت بشتغل على نفسي إزاي اتغير وأقدم حاجة مختلفة، وكنت واثقة إن دوام الحال من المحال، يمكن لو كان جالي النجاح وأنا أصغر كنت اتعودت عليه ومحسش بقيمته زي دلوقتي».

ريهام عبد الغفور

أعمال ريهام عبد الغفور

وأضافت: «فهمت ان ممكن يوم واحد يغير كل حاجة عاملة زي الغرفة 207 محدش هيخرج منها زي ما دخلها، وأنا خرجت منها بإني اتعلمت إن مفيش حاجة دايمة، ومفيش ضمانات عشان كده بدعي دايمًا إن ربنا يغير حالنا للأحسن».

وقالت ريهام عبد الغفور أيضًا: «ومن الشخصيات المهمة اللي خرجت بيها السنة دي هي إني اشتغلت مع مخرجين مهمين كلهم فادوني واتعلمت منهم لأن كل واحد فيهم ليه مدرسته الخاصة، وطلعت كمان بزمايل كتير استمتعت بالعمل معاهم».

وعن الأعمال التي نالت إعجابها في 2022، قالت: «مسلسل بطلوع الروح عجبني جدًا ، وكنا محتاجين نشوف عالم داعش عن قرب، وأكتر موضوع شاغلني ونفسي أسلط عليه الضوء هو إننا لازم يكون عندنا رحمة ببعض ونساعد بعض وما نقفش لبعض على الواحدة».

ريهام عبد الغفور

واختتمت: «أحيانًا بتضايق من السوشيال ميديا، بس قررت إن التجاهل مفيد أحيانًا، وبحب أسمع بهاء سلطان أوى، وبستمتع بكل أغانيه».

ريهام عبد الغفور تنعى الممثل هشام الشربيني: «شغلانة بتقصر العمر»

من أجل الأصلي.. ريهام عبد الغفور في سوق التوفيقية كل يوم أحد