ريهام عبدالغفور: تمنيت أكون مثل منى زكي.. وهذا العمل أنقذني من إحباط 10 سنوات

تحدثت الفنانة ريهام عبدالغفور عن بداياتها الفنية، ولماذا تمنت أن تصبح مثل الفنانة منى زكي، وسر تعرضها للإحباط 10 سنوات.

قالت ريهام عبدالغفور عبر تصريحات تلفزيونية: «لما بدأت أشتغل كنت عايزة أمثل عشان أكون زي منى زكي، وكنت بقول الله عايزة أكون زيها، وبردو بحب ممثلات كتير تانيين زي منة شلبي، حنان مطاوع، هند صبري، نيللي كريم وياسمين عبدالعزيز وجالي وقت من الأوقات قلت خلاص أنا هشتغلها لأن دي شغلانتي وأنا مبشتغلش غيرها فخلاص».

وتابعت: «كان بقالي كتير مخلصة الجامعة ومبحبش الأرقام فمش هعرف أشتغل في بنك، بس كنت من جوايا متضايقة متضايقة إن أنا مش عارفة أحقق حاجة، ومش عايزة كمان أجيب الكلام لأبويا إن ولاد الفنانين وكدة فأصل أنا جيت زي ما جيت زي ما رحت، عايزة أسيب يعني بصمة أيًا كانت البصمة حجمها قد إيه بس عايزة أسيب بصمة».

واستكملت ريهام عبدالغفور: «لغاية لما جالي مسلسل اسمه العميل 1001 دور شبه كل الأدوار اللي أنا بعملها برضه، فكانت فيه ممثلة تانية لسه معتذرة عن دور واحدة يهودية شقية كدة وبتاع فعرضت عليهم، دي كانت جرأة رهيبة مني إن أعملها ودي مش شخصيتي لأني بتكسف أوي أوي أوي، فمستحيل بالنسبة لي كرامتي إن أنا أعرض نفسي وحد يقول لي لأ دي حاجة مهينة جدًا، قلت أنا هجرب، عرضت على صناع المسلسل قلتلهم أنا مش عايزة أعمل هم عارضين عليا الدور اللي هو الطيب اللذيذ اللي هو ريهام، فقلت لهم طب أنا مش عايزة أعمل ده لأني بقالي 10 سنين بعمله فلا أنا هفيدكم ولا إنتوا هتفيدوني في حاجة، إيه رأيكم أعمل ده؟ وطبعًا حصل لهم panic اللي هو مش لايق عليا بالنسبة لهم أو اللي هو إيه ده لأ خلاص هم أنا متقولبة في هذا القالب بقالي 10 سنين فخلاص مش شايفيني في ده خالص».

واختتمت: «المهم كلموا أستاذة شيرين عادل كانت بتعمل عمرة ساعتها، ووافقت إن أنا أعمل الدور، وعشان كدة أنا ببقى ممتنة دايمًا لشيرين عادل إن هي الأستاذة شيرين عادل لأن أنا عملت معاها العميل 1001 والريان ودول الاتنين كانت أدوار مش شبه خالص اللي بعمله».