سر حركة لم الشعر.. فتاة مول أرابيلا تكشف لحظات الخطر وصدمة أول حالة

كشفت هيا عمرو فوزي الطالبة بكلية الطب جامعة نيو جيزة، تفاصيل مشاركتها في إسعاف مصابي حادث انفجار أنبوبة غاز الهيليوم بأحد المولات المشهورة (أرابيلا بلازا)، قائلة: كنت في المول وداخلة بطلب عصير وفجأة سمعت صوت انفجار ، والأنوار انطفت والسقف وقع علينا فجأة ومكناش عارفين إيه اللي حصل؟.

وتابعت خلال تصريحات تلفزيونية قائلة: حصل تدافع شديد بعد الانفجار والنور كان قاطع في المول لحظة الانفجار، وشفت دم فجاة على الأرض واعتقدت أننا اتصابنا ولكن لقينا الناس مرمية على الأرض، فطلبت من زميلتي تكلم النجدة واضطريت أني أبدأ أساعد الناس المصابة.

وأضافت هيا قائلة: أول شخص كشفت عنه لقيته مات وكان فيه شخص جنبه لسة فيه النفس وقلت للناس تروح بسرعة تطلب الأطباء والصيادلة اللي موجودين في المول، وأهم حاجة أني خليت الناس ماتحركش أي مصاب علشان لو فيه إصابة ماتزيدش الإصابة، واكتشفت بالصدفة أن من بين المصابين أخو صاحبتي ومن كتر الصدمة ماكانش عارف فيه إيه وكان بينزف من دماغه.

وواصلت هيا عمرو: الإسعاف وصلت بعد 10 دقايق من الواقعة وتم نقل الحاجات الحرجة للمستشفى وعلاج المصابين الأقل درجة في المكان، وفيه شخص كان بيحاول يلقن أخو صاحبتي الشهادة لأنه اعتقد أنه هيموت ولكن كان حالته مستقرة بنسبة كبيرة.

وعن لقطة لم شعرها خلال الواقعة، اختتمت قائلة: حركة لم الشعر حاجة كانت تلقائية ودا علشان مكانش ملموم وكان لازم يتلم لأنه كان ممكن يدايقني وأنا بساعد المصابين .