سعفان الصغير ينهار على الهواء: اشتغلت في أمريكا بغسل عربيات واتكسرت.. ورجعت منها بنتي فخورة بيا

كشف سعفان الصغير مدرب حراس مرمى منتخب مصر، كواليس كفاحه في أمريكا قبل أكثر من 25 عامًا، إلى أن وصل إلى الإنجاز التاريخي في كأس العالم 2026 مع الفراعنة في الولايات المتحدة.

قال سعفان الصغير، في تصريحات تليفزيونية: «أنا بعد ما بطلت كرة سافرت أمريكا سنة 2000 وكنت بغسل عربيات وبغسل صحون واشتغلت في مشحمة واشتغلت دليفري واشتغلت حاجات كتير جدًا وكنت حاسس إني مكسور».

أضاف «بس لما سافرت أمريكا المعسكر ده بنتي كتبت بوست إن البلد دي بابا اتكسر فيها سنة 2000 بس هو رجع لها تاني وهو بطل وأنا فخورة بيه».

أضاف «الشغل عمره ما كان عيب. اتبهدلت واشتغلت هناك، وبعد الاعتزال ما كانش قدامي حل غير السفر. قعدت خمس سنوات، وبعدها رجعت مصر».

اختتم تصريحاته «كان نفسي أمي تبقى عايشة وتفرح بيا. هي فرحت معايا قبل كده بالدوري والكأس، لكن كان نفسي تشوفني وأنا في المنتخب. كانت زعلانة عليّ وأنا متبهدل في أمريكا، وكان قلبها بيتقطع عليا».