سمسم شهاب: المهرجانات أغاني معايرات وتم استبعادي من 10 سنين

أعرب المطرب الشعبي سمسم شهاب عن استيائه من مطربي المهرجانات الشعبية، وما يقدمونه حيث وصفه باضمحلال للأغنية الشعبية.

قال سمسم شهاب في مقطع فيديو على حسابه الرسمي بموقع فيس بوك: «كفاية أوي الدور اللي بيقوم بيه مطربين المهرجانات مبوظين ودان الناس وسلوك الشباب وطريقة اللبس وكل حاجة».

وتابع: «بس أنا اتكلمت في الموضوع ده وبنادي فيه من 2010 وقلت إن ده اضمحلال الأغنية الشعبية وهدم الهوية في الأغنية الشعبية، الجيل بتاعنا كنا بنعمل أغاني بتتكلم عن الرزق والأخ والأم المستوى الاجتماعي كنا بنناقش قضايا، لكن الناس دي بتقدم إيه للناس؟ شيء صعب أوي».

واستكمل سمسم شهاب: «وكل ما بقعد مع أي حد بلقاه ناقم على الوضع طيب مين اللي راضي بيه؟، هل في شيزوفرينيا عند الناس؟، الجزء الثاني كان في ناس قالتلي إني مُقصر في حق جمهوري ونفسي، أنا بقدم شغلي وبعمل اللي عليا ومش ذنبي إن الناس مابتعملش سيرش، اللي بيحب شخص بيدعمه وبيدور عليه بس الناس بتستسهل».

واختتم: «بيقولوا إنهم عندهم ملايين المشاهدات ولكن المحترمين في الشعب المصري وما أكثرهم، مابيسمعوش النوعية دي اللي بيقعد يقول أنا عم كذا وسيد كذا، دي أغاني معايرات وسببت بين الناس حالة من الغل بدل ما نصنع بين الناس الحب والاحترام، أنا بإيدي أعمل النوعية دي وفي ثانية هبقى في حتة تالتة، ولكن مش هبقى راضي عن نفسي وهفقد احترام الناس اللي بتحبني، وأنا يعتبر تم استبعادي عمدًا من نص 2016، يعني من 10 سنين كاملين، ورغم ذلك لو بعد 100 سنة الواحد هيفضل سيرته كويسة، يا جماعة إحنا بقينا نسمع في الشارع حاجات صعبة أوي لما تقعد في فرح وتلاقي أغنية إباحية شغالة ده ينفع؟».