شوبير عن فرصة حسين الشحات الضائعة: اللاعب أخطأ.. لكنه كان بيفكر في حاجة تانية

أكد الإعلامي أحمد شوبير أن حسين الشحات، لاعب النادي الأهلي، ارتكب خطأ خلال فرصته الأخيرة أمام إنتر ميامي في كأس العالم للأندية، لكنه أوضح أن ما حدث وراءه دوافع نفسية وشخصية، يمكن تفهمها.

وقال شوبير، خلال برنامجه الإذاعي: "الناس كلها دلوقتي بتتكلم على حسين الشحات.. هل أخطأ؟ آه، هو فعلاً أخطأ. بس أنا هقول وجهة نظري، ودي مش بناءً على كلام مباشر مع اللاعب، دي تحليلي الشخصي".

وأضاف: "اللقطة اللي حصلت، حسين مكانش شايف اليمين ولا الشمال.. كان عايز هو اللي يسجل الهدف بنفسه، وده له أسباب واضحة".

وأوضح شوبير: "أول سبب إن حسين بدأ يقعد احتياطي مؤخرًا، وكان عايز يثبت للجهاز الفني إنه يستحق اللعب كأساسي.. فشاف إن الفرصة دي ممكن تكون رسالته، إنه حتى في الوقت القليل اللي بيلعبه بيجيب أهداف، وده أول هدف ممكن يسجله في البطولة".

وتابع: "السبب التاني، إن حسين عنده 4 أهداف في تاريخ مشاركاته بكأس العالم للأندية، وده بيخليه يتساوى مع أسماء كبيرة.. فكان عايز ينفرد بلقب الهداف التاريخي للبطولة، وده طبيعي لأي لاعب بيدور على المجد الشخصي بجانب مصلحة الفريق".

واختتم شوبير حديثه: "بغض النظر عن كل ده، حسين لاعب مهم جدًا، وجاب أهداف حاسمة قبل كده، ومحتاجين نسانده بدل الهجوم عليه".