«صبّر 20 عاما».. فتوح أحمد يكشف موقف مؤثر في حياته وذكرياته مع سليمان عيد

تحدث الفنان فتوح أحمد عن مواقف مؤثرة في حياته، موضحًا أن ابنته الوحيدة فرح جاءت بعد 20 عامًا من الزواج.

قال فتوح أحمد عبر تصريحات تلفزيونية: «عملنا كل حاجة علشان نخلف، ولما فقدنا الأمل قولنا مفيش نصيب، ولما روحنا نعمل عملية حقن مجهري في إيطاليا، الدكتور استغرب ليه بنعمل عملية أصلاً وإحنا كويسين».

تصريحات فتوح أحمد

واستكمل: «أنا بحب مراتي من وأنا طالب في الجامعة، وكان نفسي أخلف عشان أفرحها، لكن طول الوقت كنت مؤمن إن لو تحايلنا على الموضوع، ممكن ربنا يدينا ولد يضايقنا، فرح بنتي مليش غيرها، عمري ما مديت إيدي عليها ولا زعقت لها، دي نعمة من ربنا بعد سنين طويلة من الصبر».

كما كشف فتوح أحمد كواليس علاقته بالفنان الراحل سليمان عيد، وقال: «طيبة الدنيا كلها كانت موجودة فيه، كان دمه خفيف جدًا، ومجتهد وبيذاكر كويس، وعنده طموح غير عادي، وكان من النوع اللي لو ضغطتي عليه في الكلام ممكن يبكي.. كان حساس جدًا ودايمًا قلبه على الناس».

أسرار فتوح أحمد

وأشار إلى أن الله عز وجل أعطاه ميزة كونه صعيديًا من سوهاج، مما ساعده على التنقل بين الأدوار الصعيدي بسهولة، معلقًا: «كنت عايش حياتي بشخصيتين وكنت في بيتنا بتكلم صعيدي مع أمي وأبويا وأخواتي وفي الجامعة لهجة تانية زي باقي الشباب».

وأضاف فتوح أحمد: «مصحح اللهجة بيطلع اللغة مظبوطة والأعمال الصعيدي بتشيل من عليا حمل كتير أني أكون متفرغ للحفظ والتمثيل فقط واللي مش معاه اللهجة بيتعب أكثر وتغيري في الأداء بالأدوار الصعيدي بيكون حسب الكتابة».