«صليت استخارة وغيرت رأيي».. داليا البحيري تكشف كواليس خضوعها لعملية تجميل بالوجه

كشفت الفنانة داليا البحيري كواليس خضوعها لعملية تجميل في الوجه، بعدما كانت ترفض هذا التصرف.

قالت داليا البحيري عبر تصريحات تلفزيونية عن تجميل وجهها: «مكانش في بالي خالص إني أعمل العملية دي أول مرة سمعت عن العملية كان من نجلاء بدر».

تفاصيل عملية تجميل داليا البحيري

وتابعت: «أنا مكنتش عارفة أنها عملتها وهي حكتلي عملت إيه، وأنا قلت في نفسي لو إدوني فلوس مش هعمل العملية دي، ورُحت لدكتور البشرة بتاعي وكنت بقوله إني خاسه وتحت عيني مضايقني».

واستكملت داليا البحيري: «أنا قُلت هيقولي ناخد شوية بوتوكس، بس هو قالي مش بتفكري تعملي شد الوش، هو مش هيعملي العملية هو كان بينصحني لأنه ملوش مصلحة في إني أعمل العملية».

تصريحات داليا البحيري

وأضافت: «بعدها رحت لدكتور تاني واتكلمت معاه وقعدت شهر عشان أخد القرار وقررت إني مش هعمل العملية، بعدها رحت اتكلمت مع الدكتور تاني وأقنعني، كلمت جوزي وحكيتله وقالي أعملي استخارة».

واختتمت: «عملت استخارة ولقيت نفسي ماشية في إجراءات العملية، أنا طول عمري مش مع أي عملية تجميل تغير شكل البني آدم، أنا قلت للدكتور مش عايزة اتغير عايزة أفضل داليا بس نرجع شوية بالوقت، أنا سعيدة بشكلي والناس عارفاني كده ونجحت كده.. دلوقتي بحس أن كان في حاجات مضايقاني في وشي واتحسنت ودا مريحني ومخليني مبسوطة، أنا سعيدة بالعملية جدا وانصح أي ست متضايقة من أي حاجة في شكلها تظبطها بس براحة».