طارق العريان: أنا خجول قدام الكاميرا واتحايلنا على أحمد الفيشاوي يشارك في «ولاد رزق 3»

كشف المخرج طارق العريان أسرار ومفاجآت عن أنجح أعماله، وتفاصيل أول لقاء جمعه بزوجته نيكول سعفان.

قال طارق العريان عبر تصريحات تلفزيونية: «فيلم ولاد رزق فيه نجوم كبار كلهم فلازم أعمل حسابي أدي كل واحد دور يليق بيه ومناسب مع نجوميته.. بس الحمدلله محصلش مشاكل، وتصوير الجزء الثالث جه فجأة دون ترتيب، وأما كلمنا أحمد الفيشاوي كان عنده أفلام كتير فرفض».

تصريحات طارق العريان

واستكمل: «وقالنا استنوني 6 شهور قعدنا نتحايل عليه وهو رافض تمامًا، أما أحمد داوود صوّر ولكن لسبب خاص بالإنتاج مكملش وكان عنده تصوير بردو ولو في إمكانية يكونوا في الجزء الرابع هنجيبهم إحنا مفيش بينا مشاكل، وقدمنا أسر ياسين في فيلم ولاد رزق وإحنا مش عارفين هنعمل بيه إيه.. وأما حصل غياب الفيشاوي وداوود قررنا أننا نستعين بيه، وشغالين حاليًا على فيلم الشايب لوحده ممكن بقى ولاد رزق يدخلوا فيه وممكن لا لسة مش عارفين».

وتابع طارق العريان: «بفكر أعمل ولاد رزق 4 و5، لكن مشواره صعب لأن القصة محتاجة تتغير».

طارق العريان

أعمال طارق العريان

وقال أيضًا: «أنتجت فيلم بنك الحظ وبحاول إنتاج بنك الحظ 2، ولما حسيت إني مسيرتي في الإخراج 9 أفلام فقط، فكرت في الإنتاج وقلت (معقولة مسيرتي في الإخراج 9 أفلام فقط؟!، وزوجتي ساعدتني أكون هادي وعلى طبيعتي ومستقر».

وفيما يخص كواليس فيلم تيتو، أوضح طارق العريان أن أحمد السقا قفز في نهر النيل 3 مرات، وفي القفزة الثانية سأله عن رأيه فيها، فأجابه المخرج بأن لديه ملابس أخرى للقفزة الثالثة، وبالفعل قفز، كما أصر على تنفيذ قفزة من على السرير أثناء مشهد إطلاق النار بنفسه، لافتًا إلى أن الفنان خالد صالح كان مبدعًا في أدائه، وتصوير الفيلم استغرق وقتًا طويلًا بسبب تعقيد مشاهده وتكلفته العالية.

خوض طارق العريان تجربة التمثيل

وقال المخرج طارق العريان أيضًا: «أنا أول من صور أول ألبوم لفريق واما ووضعت لهم أغنية مشوار طويل في فيلم تيتو، أنا اللي قدمت فريق واما ووسط البلد وأنتجت أولى أغنيات رامي صبري وحسام حبيب.. ونفسي أرجع للمزيكا تاني لأني بحبها جدًا ولكن الفكرة كلها معايا كانت في الوقت وهرجع إن شاء الله أقدم مزيكا لأن الحياة بدون مزيكا صعبة جدًا».

أما عن خوضه تجربة التمثيل، علق قائلًا: «أنا خجول وقدام الكاميرا مش هعرف أمثل، لكن مثلت في مسلسل عرض خاص في 2010، هادي الباجوري كلمني وقالي هتمثل معايا في عرض خاص قولتله لا طبعًا مستحيل قالي هتيجي وهما أصلا كانوا 3 مشاهد، قولتله بس أنا عايز فلوس قالي كام قولتله 500 ألف جنيه، قالي ماشي روحت صورت وكان الموضوع موتر جدًا كل أما كان بيقول أكشن كنت بقوله استنى أنا هقول إيه؟ وفي الآخر إداني 50 ألف جنيه فقط».

واستكمل: «بحب إخراج الفيلم زى ما أنا عاوز، وقدمت 9 أفلام، و فيلم أسوار القمر أخذ وقت طويل في تصويره حوالي 6 سنوات، وتم عرضه في 2015 مدير التصوير بتاعه اتجوز وخلف وطلق وبنته بقت تيجي تحضر التصوير معانا وهي كبيرة وده بسبب أننا كنا بنصور في الماية فكنا نصور شوية وبعدين نوقف ونرجع نصور تاني بعد فترة، أما فيلم ولاد رزق تم عرضه على نجوم كتير وخافوا منه منهم آسر ياسين ورفضه ثم أحمد السقا، ومحمد رمضان، وتم عرضه على أحمد عز وشافه وعجبه ووافق عليه».

طارق العريان

لقاء طارق العريان وزوجته نيكول سعفان

كما كشف المخرج طارق العريان كواليس لقائه بزوجته نيكول سعفان، قائلًا: «اتقابلنا صدفة، أنا كنت في شغل وهي في زيارة من استراليا، قلنا هاي ومشيت وكانت المقابلة الأولى عدت شهور وفضلت فاكرها، وبالصدفة حد مشترك بيني وبينها قدر يوصلنا ببعض».

وعلقت نيكول سعفان على علاقتها بطارق العريان قائلة: «مكنتش فاهماه في الأول، لكنت طريقته كانت ناعمة أوي وأنا كنت عايزة أشوف لو ممكن أستقر في مصر، وحابة أبقى قريبة من أهلي هنا، أنا أمي مصرية وبابا سوري أرمني، وطارق ظهر في الوقت الصح».

وأشار المخرج طارق العريان إلى أنه عرض على نيكول سعفان التمثيل قائلا: «هي قالت مش عايزة تمثل، وإن عندها أهل في مصر، واتقابلنا وبقيت أكلمها في أي كلام، وفضلنا فترة أصدقاء، لغاية ما قلت لها أنا معجب بيكي».

وعن أول فيلم شاهدته لطارق العريان، قالت نيكول سعفان: «أسوار القمر، انبهرت بمشهد منى زكي وهي بتكلم نفسها بطريقة حقيقية أوي».

نيكول سعفان وطارق العريان