عاوزه أشوف ورق الإجابة بتاعتي.. طالبة ثانوية عامة تناشد المسؤولين حصولها على 4%

طالبت الطالبة ريم محمد أحمد، طالبة الثانوية العامة بمحافظة البحيرة، جميع المسؤولين وكل من يستطيع مساعدتها بتمكينها من الاطلاع على ورقة الإجابة، قائلة: "محتاجة أشوف ورقي بجد، وياريت محدش يستخدم فيها كده، عايزة أعرف الحقيقة، وذلك بعد حصولها على 4%.

وردًا على سؤال نهال طايل مقدمة برنامج "تفاصيل"، والمذاع قناة صدى البلد2، عن رد فعل والدها ووالدتها بعد ظهور النتيجة قالت ريم: "هم عرفوا النتيجة قبلي، ومامتي كانت في حالة صعبة جدًا لأنها كانت شايفاني قدامها طول السنة بذاكر وبعمل اللي عليا".

وأضافت: "هي كانت أكتر حد معايا بجد في الثانوية العامة، وكانت شايفة تعبي، وطول السنة كانت بتقولي إحنا فخورين بيكي، إنتِ عملتي اللي عليكي، لكن كان نفسها في مجموعة كويسة على قد المجهود اللي بذلته، أنا أول واحدة، وهي كانت دايمًا تقول لي أنا فخورة بيكي لأنك عملتي اللي عليكي".

وتابعت: "إحنا كعائلة قبل ظهور النتيجة كنا راضيين بأي نتيجة، لكن كان نفسي يكون مجموعي على قد تعبي ومجهودي يا ريم".

وعن أصعب مادة واجهتها خلال الامتحانات، قالت ريم: "أنا لما دخلت الامتحانات كنت شايفة إن الامتحان كويس، وطبيعي امتحان الثانوية العامة يكون فيه جزء صعب وجزء سهل، وأنا كنت بعرف أتعامل معاه كويس".

وأضافت: "حتى الحاجات اللي كان فيها تركات والمواد اللي كانت عاملة قلق زي الكيمياء والعربي، كنت عارفة إن فيها تركات وتحتاج وقت، لكن الحمد لله كنت بحل كويس والوقت كان بيكفيني، وما حسيتش إن فيه مادة هتضيع مني".

وتابعت: "في العربي مثلًا كان النحو من الحاجات اللي ناس كتير قالت عليها صعبة، لكن أنا لما خلصت الامتحان كنت شايفة إنه كويس، وكل الأسئلة كانت بتتحل معايا، وحتى الأسئلة اللي كانت محتاجة تفكير كنت بوصل لحلها في الآخر".

وأوضحت ريم: "بعد الامتحان كنت برجع مع واحدة صاحبتي الأسئلة اللي كان عليها جدل في النحو، ولقينا إننا حليناها صح زي بعض، وكنت خارجة من اللجنة وأنا حاسة إني عملت امتحان كويس، وصاحبتي اللي كنت براجع معاها جابت 97% ما شاء الله".