عايدة غنيم تروي تفاصيل مقتل والدتها وسببه

روت الفنانة عايدة غنيم، تفاصيل مقتل والدتها والصدمة النفسية التي تعرضت لها بعدما اكتشفت جثتها في بيتها.

عايدة غنيم وتفاصيل مقتل والدتها

عايدة غنيم قالت في تصريحات تليفزيونية: «قعدت 40 يوما فاقدة النطق من منظر الحادثة اللي شوفته، أنا متعودة أكلم ماما علطول وأطمن عليها، ولما متردش بتشوف رقمي وتتصل، ويومها طول الطريق وأنا رايحة بروفة المسرح كانت مش بترد ولا بتتصل، فقلقت عليها وخاصة إنها كانت تعبانة، وبدل ما أروح المسرح روحت على بيتها».

عايدة تابعت: «رنيت الجرس ومفيش حد فتح الباب، وسامعة صوت الموبايل بيرن في البيت، قلت يمكن حصل لها إغماء، وطلبت من الجيران يكسروا الباب».

واستكملت: «الدنيا كانت كحل، وجريت على البيت واتكعبلت فيها كانت واقعة على الأرض، وصرخت أول ما نوروا النور ودي آخر حاجة فاكراها».

سبب وفاة والدة عايدة غنيم

وأوضحت غنيم: «اللي عرفناه من القاتل إنه كان واخد مخدرات وانتظر طلعوها للبيت، ولما طلبت منه يساعدها ويفتح لها الباب زقها علشان يسرقها، ومسكت فيه فقتلها من خوفه إنها تقول عليه، وعلشان يتأكد من موتها قطع شرايينها».

وأضافت: 'القاتل اتقبض عليه في نفس اليوم واعترف، وحكموا عليه بالمؤبد 25 سنة سجن، وحصل عندي انهيار لأنه لم يعدم، لكن ربنا عاقبه وأصيب بالعمى، ووالدته ضربتها عربية وماتت، وابنه إتولد وهو في السجن ودي وصمة عار، والموت كان رحمة بالنسبة له».