عباس أبو الحسن بعد وفاة مصطفى فهمي وحسن يوسف: جميعنا نقترب من حافة القبور

علق الفنان عباس أبو الحسن عن كثرة الوفيات وخاصةً في الوسط الفني، خاصةً بعد وفاة الفنان مصطفى فهمي والفنان حسن يوسف.

كتب عباس أبو الحسن في منشور عبر حسابه الرسمي بموقع فيس بوك: «كنت برجع في الصفحة بتاعتي بدور على بوست معين كتبته من كذا سنة، اتصدمت أما شفت كم الناس اللي ماتت من الأصحاب الأعزة، والشخصيات العامة، والقامات الفنية».

تعليق عباس أبو الحسن على كثرة الوفيات

وتابع: «منهم كتير ماتوا ومحصلوش نص متوسط الحياة المفترض، واعتراني إحساسين وفكرتين متناقضين، ازاي إن جميعنا في طابور واحد نقترب من حافة القبور، وأن القدر ممكن ولأسباب غامضة يدفع بك في لحظة إلى أول الطابور، ومش لازم تكون مريض بمرض عضّال أو في حادثة».

واستكمل عباس أبو الحسن: «كتير ماتوا وهم نايمين، وهم في الشغل، عندي صديق عزيز مات وهو في الجيم وصديق عزيز آخر مات وهو في الجو على طيارة هو الكابتن بتاعها، الإحساس الأول إنك لازم تحاول تعيش متسق مع ذاتك، ودة يتطلب أنك تعرف نفسك معرفة حقيقية، تستمتع بعلاقات حقيقية دافئة مع ناس بتحبهم وبيحبوك، تعيش بشرف وأنك تدرك إن الشخص الوحيد في الكون اللي يفرق معاك هو شايفك إزاي هو أنت».

عباس أبو الحسن

تصريحات عباس أبو الحسن

وأضاف: «وأنك تعيش من أجل غرض ما الأفضل أنه يكون غرض نبيل، إن مفيش حد مشي في رحاب القطيع وكان متحقق وراضي وفي سلام مع نفسه، أن الحياة فعلا قصيرة وعبثية، أن الحياة لا تقاس بالنجاح وإلا مكانش فيه مشاهير وعظماء وأساطير انتحروا دون سابق إنذار».

وكتب عباس أبو الحسن أيضًا: «أن الحياة في الحقيقة تُقاس بعدد التجارب الحياتية اللي انت عشتها بشغف وبكلك، الحاجة التانية؛ إنك تدرك أن الفناء قادم لا محالة وبدون إنذار، وأن الكفن مالوش جيوب، وأن فجأة وأنا أعني فجأة، هتصحى يوم تكتشف فيه أن الحياة مبقتش قدامك، الحياة وراك، وإن أهم حاجة في الإدراك ده، أن لما يحصل ده متحسش بالذعر».

واختتم: «أنك عملت حاجات كويسة أكتر ما عملت حاجات وحشة، وأنك حبيت وأتحبيت، ومسيبتش العالم أبشع من لما جيت فيه، وأخيرًا أنك تسامح نفسك وتطبطب على روحك مش تجلدها، وإنك تقول لنفسك، إن أي حاجة عملتها كانت مدفوعة بإدراكي وفهمي ومخاوفي وقتها».

عباس أبو الحسن