عمرو سلامة: اتحبست في دور الشخص المثير للجدل

تحدث المخرج عمرو سلامة عن تعرضه لانتقادات بسبب تصريحاته، التي تتسبب له في أزمات.

قال عمرو سلامة عبر تصريحات تلفزيونية: «أنا اتحبست في دور الشخص المثير للجدل معرفش ليه مع أن أنا في الحياة مش كده ومش عارف بقول إيه مثير للجدل للدرجة دي».

تصريحات عمرو سلامة

وتابع: «يمكن أنا غلطان معرفش مش المفروض اتكلم وأقول اللي في دماغي زي ما هو بس أنا فاكر وأنا صغير لما كانوا يقولوا إيناس الدغيدي قالت كذا أو يوسف شاهين قال كذا وخالد يوسف قال كذا وأنا في أوقات كتير بقول هو ليه الناس متعصبة من تصريحاتهم».

واستكمل عمرو سلامة: «في أوقات كتير جدًا لما بقول حاجة أو يطلع مني تصريح يعمل جدل أو يعمل خناقات أونلاين ساعات بحس أن ده مفيد وساعات لأ أنا مش مستحمله».

رد عمرو سلامة على الانتقادات

وأضاف: «يعني في أوقات كتير جدًا بحس أنه مفيد أننا نفتح موضوع زي ده ونتناقش فيه كمجتمع ونكتشف إيه الصح وإيه الغلط وفي أوقات بحس أن المفروض تعدي ولا حد يستوقفها.. العصر ده مصيبته أنك طول الوقت ماشي في حقل ألغام بتقول أي تصريح في تليفزيون أو برنامج أو على النت ممكن تلاقي نفسك دوست على لغم وأنت مش واخد بالك خالص».

واختتم عمرو سلامة: «وأنت فاكر أن الكلام محدش هيقف عنده بتقول اللي جواك زي ما تكون قاعد مع صاحبك على قهوة لكن كل يوم الواحد بيتأكد أن الموضوع فاتورته غالية».