عمرو سلامة: الفن مهنة غدارة وفنانين كانت نجوم دلوقتي بيستلفوا

وجه المخرج عمرو سلامة رسالة مؤثرة بعد وفاة الفنان سليمان عيد، موضحًا أن الفن مهنة غدارة وتحدث عن ثلاثة فنانين رحلوا وكانوا يشتكون من ضعف أجورهم.

كتب عمرو سلامة في منشور عبر حسابه الرسمي بموقع فيس بوك: «فيه ثلاث ممثلين راحلين من نجوم الصف الثاني كان حظي حلو إني اشتغلت معاهم قبل وفاتهم، وكنت من عشاقهم.. لما دردشنا وفتحنا قلبنا لبعض اكتشفت أنهم مش مستريحين ماديًا، وبيشتكوا من ضعف أجورهم، وأنهم في الأغلب بيقبضوا باليوم».

تصريحات المخرج عمرو سلامة عن الفن

وتابع: «واحد فيهم مات من سنين وكان محتاج عملية مهمة في عينه ومكنش معاه فلوس لأن حتى بعض أجوره مش عارف يحصلها، وكان محرج يطلب من حد مساعدة، والشخص ده بالذات أنا كنت شايفه من رموز الكوميديا والنقاش ده حصل بينا قبل وفاته بشهور قليلة جدًا».

واستكمل المخرج عمرو سلامة: «الناس عندها انطباع إن كل الفنانين أجورهم كبيرة واستفزازية، لكن الواقع إن اللي بياخذوا أجور كبيرة هم 10% فقط من العاملين في الصناعة دي، 90%؜ من العاملين أجورهم بالنسبة لمجهودهم تعتبر مش كبيرة بالمقارنة بمهن ثانية كثير مفيش عليها نفس تسليط الضوء، غير بقى إن معظم طاقم العمل من فنيين وعمال وضعهم أصعب، ولا عندهم تأمين صحي ولا عندهم قدرة حتى يشتكوا من طول ساعات عمل ومعاملة السخرة وتأخير أجور وأحيانًا نصب واحتيال لأنهم بيشتغلوا من غير عقود».

تصريحات المخرج عمرو سلامة

وأضاف: «صديق عزيز فنان قريب كنا بنحكي مع بعض عن قصص شبه دي، وعن فنانين كمان كانت نجوم ودلوقتي بيستلفوا، وقالي جملة رنت في ودني: (الشغلانة دي غدارة)، وهي فعلا غدارة.. الكلام ده ليس لاستدرار عطف أو شفقة».

واختتم عمرو سلامة حديثه: «لكن لتصدير صورة واقعية لجمهور عريض شايف الشغلانة هلس وحرام ورفاهية ولهو، ودي قناعات يمكن صعب تغييرها لأنها متناسقة مع نظرة محافظة ما، لكن وكمان باصص بغضب لناس فاكر إن كلهم الدنيا بتمطر عليهم فلوس، لكن في الحقيقة غالبيتهم بيعانوا، يمكن ساعات أكثر منهم بكثير».