عمرو سلامة يطالب بطرد المزعجين من قاعات السينما: كابوس وقلة ذوق

وجه المخرج عمرو سلامة استغاثة إلى السينمات، وطالبهم باتخاذ الإجراءات اللازمة ضد المزعجين في صالات العرض.

كتب عمرو سلامة في منشور عبر حسابه الرسمي بموقع فيس بوك: «تجربة دخول السينما أصبحت ساعات بتتحول لكابوس، في ظاهرة قذرة بتزيد بشكل واضح.. عدد من الناس اللي في قاعة السينما اللي عندهم قلة ذوق وقلة أدب وكلاحة وبجاحة إنهم مش محترمين باقي القاعة».

وتابع: «ومستعدين يتكلموا ويهرجوا بصوت عالي أو عادي جدًا يردوا على التليفون أو يفتحوه ويلعبوا ألعاب على الموبايل ونوره يضايق اللي حوليهم والأقذر تلاقيه حاطط جزمته فوق دماغك كإنه قاعد في زريبة.. أنا زهقت من إحساس مشرف الرحلة اللي قاعد يقول للشاب ده الصوت بعد إذنك حضرتك، وللأستاذة دي النور بعد إذنك جنابك وللحاجة دي التليفون بعد إذن سعادتك وللشابة دي ماتشلتيش في ظهر الكرسي بتاعي بعد إذن فخامتك».

واستكمل عمرو سلامة: «إمتى بقى في إنعدام للإحساس والإدراك إنك بتضايق واحد جنبك وبتعكنن عليه وتبوظ تجربته اللي دافع فيها فلوس؟ والسؤال الأهم، ليه إنت دافع فلوس في دخول السينما وإنت مش مهتم تشوف الفيلم؟».

وأضاف: «ما تنزل تقعد في كافيه أو قهوة أو مطعم أو وفر فلوسك وأقعد في الليڤنج وأفتح فيلم بقى والعب على الموبايل براحتك واعمل تليفوناتك وهرج مع صحابك وعلى صوتك وجعر براحتك.. لازم على إدارة السينمات تتعامل مع الموضوع ده بحزم أكثر وتاخد إجراءات مع كل المزعجين وتطلب منهم تسيب السينما، لإن ناس كثير بقت مش عايزة تروح السينما لإنها مش هتعرف تتفرج وتتفاعل مع الفيلم».

واختتم عمرو سلامة: «وده معناه حتميًا إيرادات أقل وخسائر للسينمات نفسها، وللمزعجين أرحمونا يرحمكم الله، وعلى كل متضرر مايسكتش وياخد حقه وياخد موقف مع إدارة السينمات لحد ما نعرف نخش فيلم ونعرف فعلا نتفرج عليه».