قصة إنقاذ عادل إمام لـ أحمد سلامة في قبرص.. ماذا حدث قبل 35 عاما؟

كشف الفنان أحمد سلامة كواليس موقف لا ينسى مع الفنان عادل إمام، وذلك خلال تصوير فيلم المولد في قبرص عام 1989.

قال أحمد سلامة عبر تصريحات تلفزيونية: «عادل إمام شخصية في غاية الجدعنة اللي في الدنيا، كنا بنصور فيلم المولد في قبرص ونازلين في الشيراتون».

إنقاذ عادل إمام لأحمد سلامة

وتابع: «وأنا عايش حياتي في الطلبات وفاكر إن كله معزوم، نزلت أدفع الحساب عشان نرجع مصر، لقيت فاتورة بحوالي 3 آلاف جنيه قبرصي، وكان أيامها بـ 6 جنيه مصري ورقم، والممثل لو صابح مسافر بيشتري هدايا بالعملة وكان مش معايا ولا مليم».

واستكمل أحمد سلامة: «ابتديت أبص في الأوتيل أشوف همسح وأنضف إيه، واتصلت بأستاذ عادل وقلت له على المشكلة، فقال خد شنطتك واستناني».

عادل إمام

تصريحات أحمد سلامة

وأضاف: «ونزل أخدني وركبنا الباص وسافرنا ومعرفش حصل إيه، لكن الفاتورة اتدفعت وحبيت في مناسبة أرجع له الفلوس، فقال لي يا أحمد أنت فاكر أنا اللي دفعت؟ أنا بقول للإنتاج يدفع، بس أنت جدع، وربطتني به صداقة استمرت فترة وأنا أعشق هذا الرجل».

وقال أحمد سلامة عن قصة تعارفه على ليلى علوي وإعجابه بها: «إحنا كنا صغيرين، وليلى علوي أصغر منا، وكنا بنعمل برنامج اسمه جيل 2000، أنا وعبد الله محمود الله يرحمه ومحسن محيي الدين، مع الجميلة ربنا يديها الصحة منى جبر، وكان البرنامج أسبوعي والمفروض كل فترة تطلع معانا بنوتة في الحلقات، وفي يوم مخرج البرنامج نبيل عبد العظيم قال أنا أعرف مدام ستلا في البرنامج الأوروبي وهي عندها بنوتة لذيذة، وحضرت الفنانة الجميلة ليلى علوي وكلنا تبارينا في الحصول على إعجابها، لكن أنا كنت مهتم إلى حد كبير».

واختتم: «أنا كنت أقرب واحد من ليلى، وكانت صغيرة وأول مرة تقف قدام كاميرا، وإحنا كنا دايما معاها ونقول لها على إضائتها إزاي، وأثناء عرض فيلم يا دنيا يا غرامي في مهرجان القاهرة السينمائي نادوا على أبطال الفيلم يطلعوا على المسرح، وهي مع نجوميتها الضخمة فضلت واقفة تحت تدور عليا لغاية ما رحت لها وخدتني من إيدي وطلعنا المسرح».

ليلى علوي

أحمد سلامة

الفنان أحمد سلامة