كانت بتديله فلوس وتأكله.. زوج «هناء» ضحية بولاق الدكرور يكشف أسرار قتلها على يد ابن أختها

كشف زوج هناء ضحية بولاق الدكرور المقتولة على يد ابن اختها وصديقه تفاصيل يوم الواقعة الأليمة، معلقا: لقيت بنتي بترن عليا وبتقول الحقني يا بابا فيه حراميه دخلوا على أمي  وموتوها، ولما وصلت هنا لقيت ولادي شايلينها وودوها المستشفى ولكنها كانت ماتت.

وتابع خلال لقائه مع نهال طايل ببرنامج تفاصيل المذاع على قناة صدى البلد 2: «بنتي لما صرخت حطوا لزق على بوقها ومنعوا عنها الكلام خالص علشان متتحركش وبعدين عملوا عملتهم ومشيوا، وبعدين البنت خرجت من الأوضة اللي كانت محبوسة فيها وكلمت أخواتها وقالت لهم حرامية أخدوا الغوايش وكل اللي في  إيديها».

واستكمل زوج الضحية: «مكناش مصدقين أن ابن أخت المرحومة اللي نفذ الجريمة، وقبل الجريمة جاء القاتل وقعد مع خالته وفضل يعرف تفاصيل عننا بنخرج إمتة وبنرجع إمتة وكان بيخطط لجريمته».

واختتم قائلا: «كنت عامل له مفتاح للبيت وإحنا في منطقة شعبية وتحت البيت فرن وطلع هو وصاحبه وبدأ يتكلم من ورا الباب لحد ما فتحوا له وبعيدن زق الباب ودخل، ومراتي كانت بتعامل القاتل معاملة الابن وكانت بتديله فلوس وتأكله، واللي بيفكر في كدا دا شيطان».