كريم العدل عن «كان ياما كان»: لا أنصر المرأة ولا أشيطن الرجل.. هدفي تقديم قصة إنسانية

تحدث المخرج كريم العدل عن أسباب تقديمه قضية شائكة في مسلسل كان ياما كان، كون المرأة ترغب في الطلاق دون سبب قوي من وجهة نظر البعض.

قال كريم العدل عبر تصريحات تلفزيونية: «المخرجة شيرين دياب والمنتج أحمد الجنايني تواصلوا معي وطلبوا مني تقديم سيناريو عن قانون الأحوال الشخصية»، لافتًا إلى أنه كان هدفه تقديم السيناريو بشكل إنساني دون الالتفات للشخصية سواء رجل أو امرأة.

وتابع: «الفكرة في واحد متجوز واحدة بالنسبة لها الحياة خلصت، حست أنها عاشت عمرها كله من بيت أمها لبيت جوزها ما عملتش حاجة غير أنها اتجوزت وخلفت، وبتشعر فجأة أن الحياة خلصت وبتسأل نفسها فاضل قد إيه وهل هلحق أعيش ولا لأ، أنت داخل لا عاوز تنصر المرأة ولا الراجل».

واستكمل كريم العدل: «لا عاوز اشيطن المرأة ولا عاوز انصر الراجل، قصة إنسانية وبكون حريص على ده في جميع المسلسلات اللي بقدمها بدور على البني آدم نفسه وحاسس بإيه حتى في مسلسل أزمة منتصف العمر، رغم أن اللي عملوه غلط أنت عارف تشوف الإنسان جواه إيه وإيه دوافعه، وده دايمًا اللي بركز فيه، أنا شغلتي أني احط نفسي مكان كل شخصية وأفهم دوافعها، حتى في أقصى مراحل الشر لازم أفهم الراجل الشرير ده جاي منين وخلفيته إيه، ووصل للنقطة دي إزاي خلال حياته.. أنا كمخرج بتفهم كل الشخصيات مش مقتنع أن البني آدم لا أبيض تماما ولا أسود تمامًا».