محمد سليمان: زوجتي اعتنقت الإسلام عن اقتناع.. وبناتي ملتزمات بالدين

تحدث الفنان محمد سليمان عن كواليس زواجه من سيدة على غير ديانته، وموقفه من مبدأ القايمة أثناء زواج ابنته.

قال الفنان محمد سليمان عبر تصريحات تلفزيونية: «مفيش إكراه في الدين إحنا اتجوزنا وهي مسيحية وأنا مسلم وابتديت أشرح لها ديني وعاداتي».

تصريحات محمد سليمان عن زوجته

وتابع: «هي كانت بتسأل وأنا بجاوب، ومع الوقت حبت الثقافة بتاعتنا واعتنقت الإسلام عن اقتناع مش عشان ورق وشهر عقاري والست هي الست، بس الفرق في النظام، الست الأوروبية منظمة جدًا وماشية بجدول، المصرية ساعات بتمشي بالبركة والدنيا بتبقى ملخبطة شوية».

واستكمل محمد سليمان: «التعليم في أوروبا بيطلع الشباب عندهم مسؤولية من صغرهم، لما يقولوا كلمة بينفذوها، وأنا مسلم وبنتي مسلمة، ليه الناس فاكرة إن الفنان وعيلته لازم يكونوا مش متدينين؟».

تصريحات محمد سليمان عن ابنته

وأضاف: «الحجاب كان قرار بنتي الشخصي 100%، أنا فرحت طبعًا، بس قلت لها لو لبستيه مينفعش تقلعيه، لأن التردد بيكسر الشخصية، بنتي التانية مش محجبة بس بتصلي وصايمة وملتزمة جدًا، وأخدت جنيه واحد مهر من زوج بنتي، المهر المليون جنيه مش هيضمن إن اللي داخل ده ابن ناس، أنا أخدت جنيه مهر واشتريت راجل، والقايمة دي شيء قميء وأسوأ حاجة في المجتمع المصري، بقت بيزنس عشان نحبس الرجالة على كلام فارغ».

واختتم محمد سليمان: «الرسول عليه الصلاة والسلام معملش قايمة، واللي يضمن إنها تنقي راجل صح راجل يعرف ربنا ومثقف ومحترم، الأهل بيتسرعوا في الجواز عشان خايفين البنت تبور، لكن لازم نغير الثقافة دي ونربي أولادنا على المسؤولية من صغرهم».