محمود سعد عن قصة أبناء محمود عبد العزيز: مش عايز أضغط عليهم

خرج الإعلامي محمود سعد عن صمته ليوضح سبب كتابته منشورًا عن أزمة أبناء الفنان الراحل محمود عبد العزيز دون التواصل معهم هاتفيًا، وذلك بعدما تلقى تعليقات تتساءل عن سبب عدم رفعه الهاتف ومخاطبتهم مباشرة.

وقال محمود سعد، عبر بث مباشر على صفحته الرسمية، إنه لا يمتلك أرقام هواتف محمد أو كريم محمود عبد العزيز، ورغم إمكانية الحصول عليها، لكنه فضّل ألا يتواصل مباشرة.

وأضاف: 'أنا تابعت القصة زيكم، ومفيش عندي معلومات أكتر من اللي اتقال، والكلام كان تقيل شوية، وأنا مابحبش أضغط عليهم، لأنهم كبروا وبقوا نجوم وشخصيات تقدر تاخد قراراتها بنفسها'.

وأكد أنه فضل الاكتفاء بكتابة منشور يحث فيه على التهدئة: 'قلت أكتب كلمتين.. هم شافوهم مشافوهمش مش مشكلة، بس حسيت إنها الطريقة الأنسب، لأن دي ضريبة مهنتنا أحيانًا، نعمل حاجة مش بتريحنا لكن بتحل الموقف'.

وتابع: 'أنا وأحمد ومحمود كنا متفقين دايمًا إننا ندافع عن بعض، فحسيت إن واجبي أقول يا جماعة لموا الموضوع، مش عايزين شوشرة، لكن من غير ما أفرض رأيي على حد'.

وكشف سعد أن محمد محمود عبد العزيز تواصل معه في اليوم التالي، وقال: 'فوجئت بمحمد بيدور عليا وجاب رقمي، واتكلمنا شوية، وشكرني على اهتمامي وأنا شكرته على اهتمامه، وكانت مكالمة كويسة'.

وختم حديثه قائلًا: 'مش حابب أضغط عليهم، ولا أحب أكون وصي على حد، ومليش دور في الخلاف ده لأنه بين أطراف ليهم حياتهم وقراراتهم، لكن تمنيت بس الأمور تهدى والناس ماتتكلمش في السوشيال ميديا'.