مخرجة فيلم ريستارت ترد على طارق الشناوي: عرفت تبقى تريند

ردت المخرجة سارة وفيق على تصريحات الناقد الفني طارق الشناوي، التي انتقد بها فيلم ريستارت ومخرجته.

وكتبت سارة وفيق مخرجة فيلم ريستارت في منشور عبر حسابها الشخصي بموقع انستجرام: 'أستاذ طارق الشناوي فيه فرق كبير بين الإهانة وبين النقد.. حضرتك بتقول إن مفيش موضوع في الفيلم ودي حاجة ضحكتني جدًا لأن إحنا بنتكلم عن موضوع الساعة موضوع العصر أكبر موضوع بيهمنا ويخصنا حاليًا'.

رد المخرجة سارة وفيق على طارق الشناوي

وتابعت: 'كلامك فكرني بمشهد في الفيلم للفنان محمد ثروت وهو بيقول أنا أعمل أي حاجة عشان أبقى تريند (إحنا خدامين التريند) وسمع كلام الچوكر (الفنان باسم سمرة) اللي بيشتغل لأغراض ناس.. مبروك يا أستاذ طارق عرفت تبقى تريند من غير ما تنقد الفيلم.. تخبط في القائمين على العمل بعيد عن العمل نفسه ولا اتكلمت عن إيجابياته ولا سلبياته، لا ههاجم أشخاص وبكدة هطلع تريند بسرعة ده موضوع الفيلم اللي أنت مفهمتوش أصلا ولا هو جالك على الجرح؟'.

واستكملت سارة وفيق مخرجة فيلم سارة وفيق: 'وعلى فكرة أنا كمان بعرف أعمل تريند وهنطلع تريند أنا وأنت.. بس أنا على حق وهمنشنك عشان تظهر بسرعة.. أنت بتقول إن أغنية المقص عجبتك بس هي مش داخل الفيلم لا يا أستاذ طارق الأغنية في الفيلم بس شكل اللي بيمليك اتلخبط، ادخل شوف الفيلم اللي أنت مشوفتوش واحكم عليه بنفسك وبلاش الأفكار السطحية اللي بتقولها على كل الأفلام لأنك لو شوفت ريستارت فعلاً كنت هتعرف أن قصته أهم ما فيه'.

واختتمت: 'وبعدين حضرتك بتتكلم عن أدوات المخرج والمؤلف ولم تستخدم أدواتك كناقد فني ياريتك قولت حاجه نستفيد بيها بدال مانت طالع ترمي افيهات وإفيهات وحشة كمان.. الرقم اللي متحقق جوه مصر وبرا مش مجاملة يا أستاذ طارق ده الجمهور الحقيقي اللي بنخاطبه دول مش ولاد أختي مثلاً

الفيلم لسه نازل وداخل على خمسين مليون داخل مصر فقط وده نجاح مفرح كل صناعه الحمدلله.. على العموم دي كلمتك ورأيك والجمهور قال كلمته برضو'.

تصريحات طارق الشناوي عن فيلم ريستارت

ومن جانبه، قال الناقد الفني طارق الشناوي عبر تصريحات تلفزيونية عن فيلم ريستارت: 'الفيلم مفيش رؤية مفيش إضافة مفيش مخرج.. أنا محستش إن سارة وفيق أضافت حاجة في الفيلم، لو شيلنا اسمها وحطينا إخراج تامر حسني مش هنحس بالفرق، لأن هي مش بتستخدم أدوات المخرج، إحنا شايفين حوارات كوميدية فيها مبالغات واستظراف والمخرجة سايبة الممثلين'.

وأضاف: 'تامر لو قولت له خلي حد تاني يكتب ويخرج هيكون سلاح الأرقام لصالحه بناء على أرقام فيلم بحبك الأخير واللي كان من تأليفه وإخراجه، لو تامر جاب مريم ناعوم او شريف عرفة أو مروان حامد، هيروح في دايرة تانية، هو سلاحه الأرقام وأنا كده ناجح، وهيقولك ما يمكن الأسماء دي تنزلني درجة، هنا الزاهد، لها أدوار أعلى من كدة بكتير، لكن هذه المرة بنت حلوة وخلاص'.