مخرجة مسلسل «سابع جار» تسرد موقف إنساني لدلال عبد العزيز مع فتاة فقدت والدتها

كشفت هبة يسري مؤلفة ومخرجة مسلسل «سابع جار» عن كواليس التعاون مع الفنانة دلال عبد العزيز، التي رحلت عن عالمنا يوم السبت الماضي بعد صراع مع فيروس كورونا المستجد .

وكتبت هبة عبر حسابها الشخصي «فيس بوك»، «دلال عبد العزيز تستحق أن نحكي عنها مالم تحكيه ابدا و لو كنت رأيت منه القليل بالصدفة...في إحدى المرات كنا بتصور في مصر الجديده لقيت حد بيكلمها كل شويه بيسأل عن المكان و جاي لقيتها بتقولي دي بنت بتتفرج عليه و عايزه تشوفني عشان مامتها اتوفت قريب و وحشاها ...اتأثرت شويه بس كنا شغالين و مدام دلال طلبت شويه وقت لغايه ما البنت تيجي».

وأضافت، «وصلت بنت بسيطة محجبة شايله بيبي ميكملش ٣ شهور و جايلها من مكان بعيد جدا عشان بس تشوفها اول ما البنت شافت مدام دلال عيطت جدا و فضلت تحاول تمسك نفسها بس مقدرتش و انهارت في العياط ساعتها دلال خدتها في حضنها و فضلت تطبطب عليها و البنت تعتذر مكسوفه عشان ماتبقاش بتبشر بحاجه وحشة ودلال تقولها عيطي ولا يهمك و تدعيلها و قالتلها ما انا كمان ماما».

وتابعت، «مش انا برده ماما البنت قالتلها انا عايزه اوريكي بنتي عشان ماما ملحقتش تشوفها خدتها ولاعبتها و اتصورا مع بعض والبنت قالتلها أن ده احلي يوم في حياتها وشكرتها و مشيت و دلال كملت تصوير عادي بنفس روحها و كأنها بتعمل ده علي طول .. البنت طلبت مني اصورهم و انا فضلت اتفرج واشوف اد ايه البنت البسيطه اللي جايه من مشوار طويل نزلت فرحانه و مبسوطه بحاجه بسيطه جدا دلال عبد العزيز عملتها منغير ما تفكر و لا تتردد».

وتابعت، «ده موقف كان ليا حظ اني أحضره وعمرى ما شوفتها حكته لحد أو في برنامج او اتكلمت في الموقف لما خلص... يمكن مكانتش عايزه تحكي علي وهبه ربنا لها في حب الناس و قدرتها علي أسعادهم لكن هي دلوقتي تستحق الناس تعرف بجد هي اد ايه انسان نادر و بالذات أنها احتفظت بأنسانيتها و بأمومتها في حرب الفن و الظهور و النرجسية اللي بتصيب الفنان مهما كان قوي و ثابت لكن الأضواء ليها مفعول سحري بيغير الناس إلا دلال عبد العزيز» .

مسلسل «سابع جار» من تأليف هبة يسري، إخراج هبة يسري، آيتن أمين ونادين خان، ومن بطولة دلال عبد العزيز، شيرين، أسامة عباس، محمود البزاوي، سارة عبد الرحمن، أحمد داش، محمود الليثي، محمد علاء، نيكولا معوض، هاني عادل، هيدي كرم، عمرو سلامة وفدوى عابد.

نجوى فؤاد لـ دلال عبد العزيز: «كان لسه بدري الوداع يا حبيبتي»

يسرا اللوزي تنعى دلال عبد العزيز: «معرفتش أودعك»