مصطفى بكري: «أتمنى من الحكومة خفض أسعار البنزين لو تراجع النفط عالميا»

علق الإعلامي مصطفى بكري على قرار الحكومة بشأن تحريك أسعار الوقود 3 جنيهات؛ بسبب الحرب الإيرانية - الامريكية.

وقال مصطفى بكري خلال برنامج «حقائق وأسرار» المذاع على قناة «صدى البلد»: «دعم المواد البترولية في الموازنة المصرية بيتجاوز 147 مليار جنيه سنويًا، وده رقم ضخم جدًا، وأي زيادة في أسعار النفط عالميًا بتخلّي الفاتورة دي تكبر أكتر».

وتابع بكري قائلا: «رغم الاكتشافات الكبيرة للغاز والبترول في مصر، إلا إن الدولة مازالت بتستورد جزء من احتياجاتها من الوقود، خصوصًا السولار وبعض المنتجات البترولية، وده معناه إن أي اضطراب في السوق العالمي بيظهر تأثيره بسرعة في الداخل، والحكومة قررت رفع أسعار الوقود بحوالي 3 جنيهات للتر، وده ممكن يساهم في تقليل عبء دعم الوقود بحوالي 32 مليار جنيه سنويًا».

وواصل مصطفى بكري: «المواطن البسيط مش بيبص للأرقام ولا لحسابات الموازنة، لكن اللي بيحسه مباشرة هو إن تعريفة المواصلات بتزيد، وأسعار الخضار والفواكه والفراخ والسلع الغذائية بتتحرك لفوق، فأي زيادة في الوقود بتفتح الباب لسلسلة زيادات في السوق، وده اللي خلّى حالة الضيق تزيد عند الناس خلال الأيام الأخيرة».

واختتم بكري: «جزء من المشكلة مش بس في التكلفة الحقيقية، لكن كمان في جشع بعض التجار اللي أول ما يسمعوا عن زيادة في الوقود يبدأوا يرفعوا الأسعار بسرعة وأحيانًا أكتر من الزيادة نفسها، وأتمنى من الحكومة خفض زيادات أسعار البنزين لو انخفض السعر عالميًا».