معاناة الطفولة وتقليد النجوم.. أسرار لم تُكشف من قبل عن نور الشريف في ذكرى رحيله

تحدث المؤرخ الفني محمد شوقي عن بدايات الفنان نور الشريف، وقصص من حياته تزامنًا مع ذكرى رحيله الـ 11.

قال المؤرخ الفني محمد شوقي في مداخلة هاتفية مع الإعلامية نهاد سمير، ببرنامج صباح البلد، المذاع على قناة صدى البلد: «طبعًا كل فنان من هؤلاء العمالقة اللي في حياتنا كانت المعاناة اللي في حياتهم خاصةً في طفولتهم أثرت عليهم تأثير جعل الإبداع والفن سمة أساسية في حياتهم، وبالفعل نور الشريف في بداياته تربى يتيم والده توفى وهو عنده سنة تقريبًا واللي رباه عمه، وده كان الملاذ لنور الشريف».

بدايات نور الشريف

وتابع: «لغاية ما في المدرسة نادوه باسمه محمد جابر فطبعًا ما كانش عارف مين محمد جابر ده وهو طفل صغير، لحدما اكتشف إن اللي في البيت ده مش والده ده عمه وإن هو اسمه محمد جابر مش نور إسماعيل، فطبعًا ده أثر عليه لكن كل التأثير كل المعاناة دي أثرت عليه بالإيجاب، خلقت منه الإبداع، خلقت منه حد مبدع مثقف وقد كان يعني هو كان نور الشريف من الفنانين اللي حياتهم من بدايتهم تأثروا بالثقافة وفي الفن من خلال حي السيدة زينب اللي نشأ فيه اللي كان حي مليء بالأشياء الجميلة اللي تأثر وتخلي أي حد يتولد جواه فنان».

واستكمل المؤرخ الفني حديثه عن أسرار نور الشريف: «بدايته حب الزمالك وحب الكرة في الأول والتحق بأشبال نادي الزمالك لكن طبعًا لما دخل معهد التمثيل مكنش ينفع طبعًا لأنه بيستمر طبعًا بيسهر بيمثل في مسرحيات، فيه شغل وطبعًا ده بيتنافى مع الرياضة اللي لازم يصحى بدري ويكون في معسكر أو في تدريب فطبعًا اختار التمثيل واختار الفن وأصبح نور الشريف».

أسرار نور الشريف

وأضاف المؤرخ محمد شوقي: «وقت بداياته كان فيه عربيات متجولة للعروض التمثيلية في الأحياء الشعبية، مسارح متجولة وفرق متجولة على عربيات ودي كانت موجودة في الوقت ده، فحب نور الشريف إن وهو طفل بدأ يدرك الحياة من حواليه حب يقلدهم ويقدم حاجة زي كده وبدأ بعربية كارو وعمل كأنه مسرح ويشتغل وكان بيقلد فريد شوقي وأنور وجدي».

واختتم: «اتعرض على الفنانة بوسي في مسلسل القاهرة والناس وكانت لسه بوسي في 3 إعدادي، وبدأت إشارات الحب تدب بينهم، اتعرفوا على بعض وكانوا صغيرين جدًا، وأهل بوسي كانوا رافضين زواجهم، بوسي كان عندها حلم وحلمت مع نور الشريف إنهم يكونوا نجوم وحصل وعاش مع الحلم نور الشريف فعشان كده كانت قصة الحب اللي بينهم مش مجرد حب رومانسي ده حب للفن كمان هم لقوا نفسهم في الفن وكان أكبر داعميها».