من الذاكرة| أحمد زكي: محدش يحب يفضل عازب وغبائي سبب فشلي بالحياة

تحل ذكرى ميلاد الفنان الراحل أحمد زكي اليوم الاثنين 18 نوفمبر، فهو من مواليد اليوم نفسه عام 1946.

تحدث أحمد زكي في لقاءات سابقة له، عن أسرار وحكايات من حياته من بينها كونه عازب عقب انفصاله عن هالة فؤاد.

أحمد زكي العازب

قال: «محدش طبعًا يحب يفضل أعزب، ولكن الزواج والطلاق والحياة والموت كلها أمور قدرية محدش له دخل فيها».

ذكرى ميلاد أحمد زكي

قال أحمد زكي في لقاء قديم له، إن غبائه سبب فشله في الحياة، وعانى كثيرًا بسبب طبعه وقلة خبرته ونضجه.

واستكمل: «اللي حصل ما بيني وبين هالة فؤاد اسمه غباء الحب، وهو أننا بنحب بعض أوي بس مش عارفين نتفاهم، كنت ساعتها صغير ويتيم وعايز أجيب 6 أولاد، أنا ولد بقى وعايز مراتي تقعد في البيت وتخلف عيال كتير وأمارس دور سي السيد».

وتابع أحمد زكي: ««هي حبتني وأنا كمان حبيتها جدًا، بس هي كانت حابة الفن ووافقت إنها تسيبه وحسست نفسها بكده عشاني وأنا صدقت في غمرة الحب، وهي كتمت مشاعرها عشان الارتباط ومصارحتنيش وأنا ما أدركتش ده، وكنت مبسوط جدًا بتنازلها وعملت شرط عليها إنها تسيب الفن وفي نفس الوقت أنا كنت بعمل الحاجة اللي بحبها».

واختتم: «هي غلطت إنها وافقت وأنا غلطت إني ماستجبتش لرغبتها وشوفت هي عايزة إيه وقد إيه بتتنازل عشاني، ولما بيبقى شيء مختفي بين الاتنين، بيحصل قلق، وجه لما حصل هالة ابتدت أنها تفصح عن ده والأسرة اتدخلت، ولما بتاخد جانب من الطرفين بيدمروا العلاقة، وأنا كنت عنيف وهي مكنتش عايزة تعبر وحصلت قفلة أو غباء الحب، وده بيحصل في ناس كتير بتسيب بعض وهما بيحبوا بعض، وخلال 4 سنين انفصال كنا بنحاول نرجع، بس هي ابتدت تشتغل في الفن وبقى أمر واقع وأنا طبعًا اتعصبت وقولت أنها واخداها تحدي معايا وبتعاندني، وأنا ندمت بعدين أما ارتبطت واتجوزت».