منة فضالي تكشف تفاصيل تعرضها للسرقة على يد خادمتها: كانت بتشتغل في المخدرات بنيجيريا

كشفت الفنانة منة فضالي تفاصيل تعرضها للسرقة من خادمتها الأجنبية، ونشرت صورها على حسابها الشخصي بموقع فيس بوك.

كتبت منة فضالي في منشور على صفحتها: «البنت دي بقالها عندي سنة وشهرين اسمها سميرة ومش معاها باسبور وقولتلها هاتي باسبور أعملك إقامة قالتلي محتاجة يومين إجازة طلبت المكتب ييجي ياخدها علي أساس إنها هتروح تيجبلي باسبورها».

وتابعت: «وإدتها تليفون علشان معهاش تليفون علشان أعرف أكلمها أول حاجة محبتش حد يعرف عنوانها وخليت المكتب يوصلها في مكان بعيد وواحدة جت أخدتها منهم وبعدين تليفون اتقفل وعملت بلوك ليا ولأمي واكتشفنا بعدها إنها سارقة كل حاجة من البيت عن طريق أكياس القمامة السودة وهي خارجة من عندنا كان معاها شنطتها الصغيرة».

واستكملت منة فضالي: «بعد كدة لقناها واخدة حلق وخاتم أمي الذهب وسلسلة ذهب كبيرة وسارقة هدوم كتير من عندي وشنط غالية.. 3 ساعات كلمت المكتب وهما حاولو يوصلولها راحت مخلية واحدة تزعق معاهم وعملت للمكتب بلوك ودي صورها ببعض الحاجات اللي سرقتها من عندي والست دي هي المسئولة عنها حاولت أتواصل معاها قفلت في وشي وعملت بلوك».

وأضافت: «روحت القسم وعملت محضر بالمسروقات وإدتهم رقم باسبورها وإن شاء الله يعرفو يجيبوها

المشكله الأساسي إني عرفت بعد كده أن البنت دي بتشتغل مع حد في نيجيريا بتاع مخدرات وإنها متصابة كذا مرة بالرصاص.. مش عارفه إزاي الناس دي بتدخل البلد اللي زي دول لازم نحرص منهم للأسف أنا عملت خير معاها أوي أوي ربنا اللي يعلم والناس كلها اللي جاتلي بيتي شافت أنا كنت بتعامل معاها أزاي بس اكتشفت أن دول معندهمش ضمير وكدابيين وطبعهم الخيانة».

واختتمت منة فضالي: «هتقولولي وإيه اللي يخليكي تشغلي واحدة أجنبية أقولكم لأني جربت مصريين كتير ومنهم اللي اتهجمت على أمي وهي لوحدها وأنا كنت في التصوير وفي اللي كانت أخلاقها مش حلوة وفي اللي كانت بتصورني وأنا قاعدة وتبعت لناس صوري فقولت خليني أجيب حد لا يعرفني ولايعرف لغتنا ويمكن يكونو أحسن مع أن فيه مصريات كتير كويسين بس مش بيرضو يباتو وأنا لازم حد يكون مع أمي طول ما أنا في الشغل لأن مقدرش أسيبها لوحدها.. أنا بنزل الكلام ده وربنا يعلم أنا كنت بحب البنت دي قد إيه لكن اكتشفت حقيقي اتقي شر من أحسنت إليه لو حد بيتعامل مع الست دي خلي بالكم وإن شاء الله القانون هيجبلي حقي منها لله».