مها أحمد باكية: عمري ما طلبت لابني فلوس زي ما الرئيس عامل لذوي الهمم

تحدثت الفنانة مها أحمد، لأول مرة على مرض نجلها - من ذوي الهمم قائلة: «أنا عندي أحمد ابني من ذوي الهمم، وبدخل افك الهدايا اللي بكسبها وأطلعها لذوي الهمم بس مش لازم اقول كده».

مرض ابني بسبب خطأ طبي ومش من عند ربنا

أوضحت مها أحمد خلال تصريحات تليفزيونية، قائلة: «احمد ابني من ذوي الهمم، والسبب في اللي حصله كان دكتور عمل خطأ طبي، ومقاضيتش الدكتور لأنه مش هيرجعلي مخ ابني لأنه نقص اكسجين، والسبب وأنا بولد أن الدكتور شده بالشفاط، وبعدها خرجني ولدت في أوضة قيصري، ولو كنت قلت ساعتها عمرهم ما هيقولوا الحقيقة اللي حصلت جوه اوضة العمليات، وهو بالنسبالي الحياة وممكن ربنا يكون عمل كده عشان ادخل الجنه انا وجوزي من غير ما نتعب في الدنيا».

أضافت مها أحمد قائلة: «ابني لحد دلوقتي تعبه متعة وراحة بالنسبالي، أنا مش بعيط عشان احمد كده، ولكن أحمد مالوش ذنب في كده، أنا لما كان ابني بيرجّع كنت بدوق الترجيع، عشان طريقة الدوا كده فبدوق عشان اعرف ده الدوا ولا لأ لأن دي سموم».

عمري ما طلبت من النقابة فلوس لابني

وتابعت مها أحمد قائلة: «وانا نازلة لازم احكيله ولو ضحك بعرف ان كده الموضوع اللي رياحة اعمله هيمشي، وانا اي مكان بروحه باخده معايا ومجدي جوزي بيروح يشوف مكان مناسب عشان يبقى ينام فيه، واللي الناس متعرفوش انى كل سنة بدخل بيه المستشفى عشان عنده نقص حديد ومحدش يعرف حاجة غير أهلي، وعمري ما طلبت لا من النقابة ولا اي حد فلوس، ولا سعيت اني اجيبله معاش زي ما سيادة الرئيس عامل للأطفال ذوي الهمم، ولو بتاجر بابني كان زماني في كل بلد شوية».

وأضافت مها أحمد قائلة: «هفضل اشتغل على الـ تيك توك، ولو جالي شغل في منصة هشتغل، وانا دخلت الجنة وأنا في الدنيا، مش بعيط عشان اللي حصل لابني ولا أنه معيوب، لو من عند ربنا عادي لكن لما يبقى خطأ طبي ده اللي بيزعل، وأنا في الجنة هسمع منه ياماما وهجوزه في الجنة وربنا واعدنا بكده، ولكل أم ابنها كده اصبري هتشوفي هيبقى ازاي في الجنة».