مواجهة ساخنة على الهواء بين محامي سارة وطليقها.. خطف ابني وبينكر.. فيديو

واجه محامي سارة سيدة الإسكندرية، محامي طليقها بعد حرمانها من طفلها، على الهواء وسط انهيار الأم على طفلها وتعنت الزوج، في مشهد مؤلم كشف تفاصيل صادمة حول اختفاء الطفل 'سليم'، وفي لحظة تختلط فيها الدموع بالغضب، والحقائق بالشكوك، جلست سارة، سيدة الإسكندرية، تبحث عن إجابة واحدة: أين طفلي؟.

بدأ محامي سارة حديثه مع الإعلامية نهال طايل، في برنامج 'تفاصيل' المذاع على قناة 'صدى البلد2' قائلًا: 'بعد المشاكل اللي حصلت وبعد ما سارة مشيت، حصل تواصل بين الأهالي، وهو لما جه سأل على الصور اللي سارة قدمتها للمراحل العمرية لسليم، قال إن الصور دي تخصه ونزلت على اللابتوب بتاعها، وسألها فين اللابتوب؟'.

وأضاف مستنكرًا:'بعد المشاكل وابنك ضايع منك، هتهتم بداتا ولابتوب ومش هتسأل على ابنك؟، ودخل كلمها وما سألش على ابنه وسأل على اللابتوب'.

واستكمل:'هو بيقول إنه طلق عشان مش عارف يخلف، طب اتجوز عشان يجيب عيال، وجابت الطفل، ولما حصلت مشاكل قال الطفل مع الأم، طب ما حررش محضر فقد للطفل؟'.

وتابع كاشفًا تناقضات الرواية:'هو عامل لها محضر ضرب ووالده عامل لها محضر سرقة، وفي نفس الوقت بيقول مش هشتكيها عشان دي أم ولادي'.

وأشار إلى أن الصور التي تم تقديمها تثبت تسلسل عمر الطفل، قائلاً:'أنا معايا تسلسل عمري بالصور والتواريخ لسليم في كل مراحله'.

وسط هذا الجدل، لم تجد سارة سوى كلمات قليلة تختصر وجعها، قائلة:'ما يوجعونيش مرتين.. كفاية أوي حرمان لحد كده'.

وأوضح محامي سارة:'حررت محضر بأن الصغير تم فقده في حيازة الأب، وطلبت فتح تحقيق مع سارة وأحمد للوصول لسليم'، مؤكدًا:'اتهمت الأب بشكل مباشر وقلت له: الطفل اختفى في حوزتك'.

من جانبه، رد محامي طليق سارة قائلًا:'أنا عندي شهادات ناس شافوا الطفل'، في محاولة لإثبات رواية الأب.

لكن محامي سارة رفض هذا الطرح، مؤكدًا:'لو كلامه صح ما كانش هيبقى في التناقضات دي كلها، اللي إحنا فيه ده مش طبيعي، ده حد بيتستر على فعل أكبر'.