نحن لا نبدأ حرب.. مصطفى بكري: بأمارة إيه إثيوبيا تقول أنا هسيطر على مياه النيل

فتح الإعلامي مصطفى بكري، ملف السد الإثيوبي وتطورات الأوضاع في المنطقة حول هذا الملف.

وقال خلال برنامج «حقائق وأسرار» على قناة «صدى البلد»: «ماذا يُحاك لمصر في ملف مياه النيل؟ إثيوبيا بتعلن تفعيل اتفاقية عنتيبي، ومصر بتقول إن الكلام ده مرفوض ويمثل تهديدًا لحقوقها المائية. الموضوع مش مجرد اتفاقية جديدة، الموضوع هو مين يملك القرار في مياه النيل، ومين يقدر يتحكم في تدفق المياه لمصر والسودان. إثيوبيا بتقول استخدام عادل ومنصف للمياه، لكن مصر بتشوف إن الكلام ده ممكن يفتح الباب لإعادة توزيع مياه النيل من غير موافقة دولتي المصب».

وتابع مصطفى بكري: «هنا لازم نقف، لأن مصر مش دولة عندها بدائل كثيرة للمياه.. النيل بالنسبة للمصريين مش رفاهية، النيل هو شريان الحياة.. اتفاقية عنتيبي بدأت فكرتها من سنوات، ووقعت عليها عدة دول من حوض النيل، لكن مصر والسودان رفضاها. والخلاف الأساسي إن الاتفاقية الجديدة لا تعترف بالحصص التاريخية لمصر والسودان باعتبارها حقًا ثابتًا».

وأضاف مصطفى بكري: «مع أزمة السد الإثيوبي، المشهد أصبح أكثر تعقيدًا.. إحنا قدام ملف بيتحرك في أكثر من اتجاه سواء السد الإثيوبي، اتفاقية عنتيبي، سدود جديدة محتملة، ومحاولات لإعادة صياغة قواعد إدارة مياه النيل. بأمارة إيه إثيوبيا تقول أنا هسيطر على مياه النيل.. دي بلطجة إثيوبية.. وقت الجد كل الأوراق المصرية هتتحرك دفاعا عن أمننا القومي.. نحن لا نبدأ حرب وإنما ندافع عن أمننا ووجودنا وحقنا».

واختتم بكري قائلا: الموضوع أخطر من مجرد أرقام وحصص، لأن أي نقص في مياه النيل مش هيتوقف عند وزارة الري.. ده هيمس الزراعة، والغذاء، والصناعة، وحياة ملايين المصريين، وعشان كده مصر بتتعامل مع الملف باعتباره قضية أمن قومي.